Ramon Maçado: "Bu yaşımda ora getsəm həyat yoldaşım məni öldürər"

Premyer Liqanın II turu çərçivəsində baş tutan "Araz-Naxçıvan" - "Şamaxı" qarşılaşması meydan sahiblərinin minimal hesablı (1:0) qələbəsi ilə yekunlaşıb. Oyunda vurulan yeganə qolun müəllifi Ramon Maçado Sport24.az-a müsahibə verib.  

- Vurduğun qol həlledici oldu və komandan meydandan 3 xalla ayrıldı. Oyunla bağlı fikirlərin maraqlıdı...
- Matça yaxşı hazırlaşmışdıq. Qələbə qazanıb həm özümüzə inamı artırmaq, həm də azarkeşlərimizi sevindirmək istəyirdik. İstəyimizə nail olduq. Bilirik ki, asan oyunlar olmur. Odur ki, bu qələbə irəlidəki matçlarda bizə motivasiya olacaq. Əlbəttə ki, qol vurmağıma sevinirəm. Amma əsas olan mənim fərqlənməyim yox, komandamın uğur qazanmasıdı.

- Oyun planında "Araz-Naxçıvan"da çatışmazlıqların olduğu sezilir...
- Mövsüm təzə başlayıb. Həmçinin özüm də daxil komandada yeni oyunçular var. Onlar kollektivə tam uyğunlaşmayıb. Buna baxmayaraq, "Araz-Naxçıvan"da səviyyəli futbolçular yer alıb, turdan-tura daha da "artıracağıq".

- Buna qədər Azərbaycnda "Neftçi" və "Qəbələ"nin formasını geyinmisən. Ötən mövsüm istər "ağ-qaralar", istərsə də "qırmızı-qaralar" üçün heç də yaxşı keçmədi. Paytaxt təmsilçisi avrokuboklardan kənarda qaldığı halda, "Qəbələ" ümumiyyətlə, Premyer liqanı tərk etdi...
- Ötən mövsümü Malaziya təmsilçisi "Sabah"ın şərəfini qorumuşam.  Sabiq komandalarımın ötən "futbol ili"ndəki çıxışlarını izləmək imkanım olmayıb. Ona görə də onlar barədə nəsə deyə bilmərəm. Hər birinə uğurlar arzu edirəm. Bu gün məni düşündürən "Araz-Naxçıvan"dı.

- Yenidən ölkəmizə qayıtdın. Azərbaycanı necə xarakterizə edərdin?
- Əvvəllərdə ölkənizdə çıxış etdiyimdən buralara alışmışam. Mən və ailəm özünü Bakıda xoşbəxt hiss edir. Bir yerdən məmnunsansa deməli, hər şey qaydasındadı. Malaziyadan fərqli, Azərbaycanda dostlarım, tanışlarım çoxdu. Futbol mentalitetinizə öyrəşmişəm. Həmçinin sizdə futbol daha çox inkişaf edib.

- Braziliyalılar ilə azərbaycanlılar fərqli mentalitetə sahibdi. Bizim sizlərdən fərqimiz nədi?
- Əlbəttə ki, fərqli milli-mənəvi dəyərlərə malik xalqlarıq. Azərbaycanlıların mentalitetində xoşuma gələn cəhətlər çoxdu. Onları bir-bir sadalasam uzunçuluq olar. Qısaca deyim ki, insanlarınız mehriban, deyib-güləndi. Düşünürəm ki, bir braziliyalının Azərbaycanda darıxması üçün səbəb yoxdu.

- Braziliya karnavalları üçün darıxmırsan?
- Karnavallar dövrümü bitirmişəm. Artıq 33 yaşım var. Bu yaşımda ora getsəm həyat yoldaşım məni öldürər (gülür).




ABDULLA İSMAYILOĞLU