Ramin Musayev "Sabah"ın Avrokubok şansı, "Zirə" və "Araz-Naxçıvan"ın oyunları, legioner limiti və milli komanda haqqında danışdı

"Sabah"ın bu gün təyin olunmuş baş məşqçisi özü ilə yeni futbolçular gətirəcək. Həmin oyunçuların bir-birini anlamasına görə vaxt lazımdır. "Sabah" üçün avrokuboklar çətin olacaq".

Bu sözləri Sport24.az-a açıqlamasında Peşəkar Futbol Liqasının (PFL) sabiq prezidenti Ramin Musayev deyib.

Keçmiş funksioner "Zirə" və "Araz-Naxçıvan"ın Konfrans Liqasındakı oyunlarından gözləntilərini açıqlayıb:

"Sabah" üçün avrokuboklar çətin olacaq. "Zirə"nin rəqibi "Hayduk" güclü olsa da, düşünürəm "Zirə" və "Araz-Naxçıvan" mübarizə apara biləcəklər. Transferlərdən çox şey asılıdır. Elmar Baxşıyevə o qədər inanıram ki... Düşünürəm gözəl oyun nümayiş etdirəcəklər. "Qəbələ"də çalışandan izləyirik, baş məşqçi kimi potensialı var". 

O, həmçinin Misli Premyer Liqasında növbəti mövsümlə bağlı gözləntilərini bölüşüb:

"Legioner limitinin ləğvi yerli futbolçular üçün çətin olacaq. Çalışmaq lazım olacaq ki, heyətə düşə bilsinlər. Ən çox isə milli komandaya təsiri olacaq. Qərarı verənlər komandaları düşünüblər, yığmanı yox. Futbolçunun oyun praktikası olmasa, necə çıxış edə bilər? Yəqin hazırda çalışırlar deyə onlar daha yaxşı bilir. Həyatımın 19 ilini futbola həsr edən adam kimi deyirəm, milli üçün xoş nəticə görmürəm. Futbolçu hər vaxt zədə ala bilər. Bir hücumçu ilə heç nə edə bilmərik. Yığmanın səviyyəsinin aşağı olan vəziyyətdə belə qərar qəbul etmək qeyri-peşəkarlıqdır".

Qeyd edək ki, UEFA Konfrans Liqasında II təsnifat mərhələsinin görüşləri iyulun 24-ü və 31-də keçiriləcək.