Ramin Musayev: "Güclü komandaların stadionlarında "Qarabağ" adının səslənməsi qələbədir"

"Belə komandaların Azərbaycana gəlməsi artıq qələbə sayılır".

İdman.biz xəbər verir ki, bunu Teleqraf-a açıqlamasında PFL-in 2008 - 2022-ci illərdə prezidenti olmuş Ramin Musayev "Qarabağ"ın UEFA Çempionlar Liqasındakı rəqiblərini dəyərləndirərkən deyib.

O, Ağdam təmsilçisinin xallar qazanacağına inandığını söyləyib: "Düşünürəm ki, 2-3 komandadan xal almaq mümkündür. Əsasda evdəki oyunlarımızda bunu edə bilərik. Ötən mövsüm UEFA Konfrans Liqasının əsas mərhələsində evdə "Ayaks"la pis oynamamışdıq. Bəlkə də, Julio Romao qırmızı vərəqə alaraq komandasını azlıqda qoymasaydı, hesab 0:3 olmayacaqdı. Amma həm "Ayaks", həm də "Ayntraxt Frankfurt" elə-belə komanda deyillər. Rəqiblərdən "yola gediləsi" bircə "Kopenhagen"i saymaq olar (gülür - red.). "Liverpul"un, "Napoli"nin, "Benfika"nın və "Atletik Bilbao"nun stadionlarında Qarabağ və Azərbaycan sözlərinin işlədilməsi artıq qələbə deməkdir. "Çelsi"yə gəlincə, bir az real danışarsaq, hələ o səviyyə çatmamışıq. Lakin, Qurban Qurbanovun futbolçularını onlara qarşı yaxşı hazırlaşdıracağına inanıram".

Musayev "Qarabağ"ın bu oyunlardan böyük təcrübə qazanacağını bildirib: "Bu, çox vacib amildir. Unutmayın ki, "Qarabağ" güclü rəqiblərə qarşı daha yaxşı oyun nümayiş etdirir. "Çelsi", "Liverpul" və "Napoli" kimi komandaların futbolçularında inanmıram ki, arxayınlıq olsun. Üstəlik, "Qarabağ"ın adını eşidərək artıq həyəcanlandıqlarını da düşünürəm (gülür - red.)".

Qeyd edək ki, "Qarabağ" UEFA Çempionlar Liqasının əsas mərhələsində "Liverpul" (İngiltərə), "Benfika" (Portuqaliya), "Napoli" (İtaliya) və "Atletik"lə (İspaniya) səfərdə, "Çelsi" (İngiltərə), "Ayntraxt" (Almaniya), "Ayaks" (Niderland) və "Kopenhagen"lə (Danimarka) evdə qarşılaşacaq.

İdman.biz