Idman.biz
"Neftçi" ilə müqaviləni qarşılıqlı razılıq əsasında pozan Ramil Şeydayevin yeni kluba keçidi yubanır. Millimizin hücumçusunun "Qarabağ"la anlaşdığı deyilsə də, hələ ortada rəsmi açıqlama yoxdur.
İdman.biz Futbolinfo.az-a istinadən xəbər verir ki, millimizin üzvünün hələ də işsiz qalması təsadüfi deyil.
Azarkeşlərin sosial şəbəkədə Ramili 3-cü dəfə heyətinə qatmaq istəməsi üçün "Qarabağ"ı tənqid atəşinə tutması klubun qərarına təsir edib. Ağdamlılar bu keçidi reallaşdırmağa ehtiyatlanır. Klub rəhbərliyi yüksək məvacib istəyən hücumçunun komandaya xeyir verəcəyindən əmin deyil.
Əslində, Qurban Qurbanov da bunun risk olduğunu anlayır. Son mətbuat komfransında baş məşqçinin bu barədə çəkingən danışması təsadüfi deyildi. Amma istədiyi legioner transferlərini reallaşdıra bilməyən çempionun heyəti kasaddır. Çempionlar Liqası bir yana, daxili yarışlar üçün də xüsusilə hücumçu qıtlığı diqqət çəkir. Bu səbəbdən Şeydayevin heyətə qatılması haqda düşünülür.
Ramil isə onunla bağlı qərarın yubanmasından narahatdır. Bu səbəbdən hücumçu başqa klubla danışıqlara başlayıb. Belə ki, "Qarabağ"ın keçmiş oyunçularını düşərgəsinə yığan "Araz-Naxçıvan" Şeydayevlə də müzakirələr aparır. 29 yaşlı oyunçu yüksək maaş tələblərini yumşaltsa, onu hazırkı liderin sıralarında görə bilərik.
İdman.biz
