Idman.biz
"Millətlər Liqasında bu cür güclü rəqiblər olmayacaq, uzağı 1 güclü komanda ola bilər".
Azərbaycan millisinin sabiq yarımmüdafiəçisi Ramazan Abbasov futbolinfo.az-a müsahibəsində deyib.
Həmin müsahibəni təqdim edirik:
– Yığma komandamızın Fransa (0:3) və Ukraynaya (1:2) məğlub olduğu səfər oyunlarını necə dəyərləndirirsiniz?
– Fransanın gücü hər kəsə məlumdur. Həddindən artıq güclü rəqiblə üz-üzə gəlirdik. Fransızlarla oyunda məqsəd ancaq az qol buraxmaq idi, millimiz bunu bacardı. Fransaya qarşı oyun göstərmək mümkün deyildi və bu, başadüşüləndir. Ukrayna ilə matça gəlincə, millimizin son illərdə göstərdiyi ən yaxşı oyunlardan biri idi. Futbolçularımız Ukrayna millisindən qorxmadılar, çəkinmədən mübarizə apardılar. Qol vura bildik, başqa epizodlarımız da oldu. Gələcəyə nikbin baxmaq olar.
– Sizcə, Ayxan Abbasov millidəki ilk matçlarından bizi gələcək uğurlara inandıra bildi?
– Əlbəttə ki, yerli məşqçi amili böyük rol oynayır. Yerli məşqçi öz futbolçularımızı, futbolçularımız da onu yaxşı tanıyır və bir-birləri üçün əllərindən gələni edirlər. Əsas məsələ məşqçinin futbolçuları yaxşı tanımasıdır. Bu gün Azərbaycan millisinin legioner mütəxəssisə ehtiyacı yoxdur. Ən vacibi odur ki, ilk növbədə aşağı yaş qrupları üzrə millilərimiz nəticələr versinlər. Bu baş verdikcə, gələcəkdə əsas yığmamız üçün də faydalı olacaq. Bu gün yerli futbolçuların qıtlığı millini də çətin vəziyyətə salır. Çempionatda legioner limitinin ləğvi o deməkdir ki, klublarımız gənclərə elə də çox şans verməyəcəklər və vermirlər də – bu, göz qabağındadır. Gənc futbolçularımız Premyer Liqa klublarında əsas heyətdə oynamalıdırlar ki, gələcəkdə A milliyə də faydalı olsunlar. Əvvəllər U-21-də oynayan uşaqların 99 faizi yüksək dəstədə əsas heyətdə oynayan uşaqlar idi.
– Gələn ay bizi İslandiya və Fransa ilə ev oyunları gözləyir. Bu görüşlərdə hansı nəticələrə ümid edirsiniz?
– Millidə ən vacib məsələ nədir? Gəlmisənsə, can qoymalısan. Bugünkü gündə uşaqlar həqiqətən də sona kimi mübarizə aparırlar. Görünür ki, istək var. Buna görə də yaxşı nəticələr gözləmək olar.
– Millinin son 3 oyunundan sonra əksəriyyət hazırkı yığmanın Millətlər Liqasında uğurlu çıxış edəcəyinə inanır. Sizdə də bu inam varmı?
– Millətlər Liqasında bu cür güclü rəqiblər olmayacaq, uzağı 1 güclü komanda ola bilər. Mənə elə gəlir ki, həmin turnirdə qrupdan çıxmaq mümkündür. Hamımız millimizin nəticələr verməsini istəyirik. Ümid edirik ki, hər şey yaxşı olacaq.
– Ayxan Abbasova qədər uzun illər millimizə xarici məşqçilər rəhbərlik etdi. Onları gətirməklə illəri boşa verdik. Elə deyilmi?
– Əlbəttə, elədir. Uzun illər ərzində millimizə gəlib-gedən xarici məşqçilərin Azərbaycan futboluna heç bir xeyri olmadı. Onlara xərclənən pullar vaxtında aşağı yaş qruplarına xərclənsəydi, bəlkə də bu gün millimizdə futbolçu seçimi daha çox olardı. İnşallah, bundan sonra bu istiqamətdə işlər yaxşı gedər.
