Sport24.az
"Mövsümün ilk oyununda rəqib çempionatın iddialı klublarından biri idi. Bilirdik komandanı ağır oyun gözləyir". Bu sözləri Sport24.az-a Birinci Liqa təmsilçisi "Şahdağ Qusar"ın prezidenti və kapitanı Rahid Əmirquliyev deyib.
Təcrübəli futbolçu komandasının MOİK-i məğlub edərək mövsümə 3 xalla başlamasını şərh edib:
"Məlum olduğu kimi, klubumuzda çempionat öncəsi problemlər yaranmışdı. Sponsor məsələsi sual altında idi. Futbolçular başqa klublarla müqavilə imzalamışdı deyə, oyunçu tapmaq asan deyildi. Ona görə də komanda çempionata tam hazır deyil. Yəni, heyət gec yığıldı. Şükürlər olsun ki, məşqçi heyətimiz çox əziyyət çəkərək, kollektivə futbolçular cəlb edə bildilər. Düzdür, heyətimiz geniş deyil. Futbolçuların çoxusu gənc və perspektivlidir. İnanıram gələcəkdə həmin oyunçulardan bəzilərini Premyer Liqada görəcəyik. Qalib gələn komandadan narazı qala bilmərəm. Ehtiyat edirdik, şükür ki, sonda nəticə istədiyimiz kimi oldu. Oyun baxımından nədən razı, nədən narazı qalması baş məşqçinin işidir. Mən tərəfdən heç bir narazılıq yoxdur".
Qeyd edək ki, "Şahdağ Qusar" ilk turda səfərdə MOİK-i 2:1 hesabı ilə məğlub edib.
