Sport24.az
"Heyətdə yer alan bütün futbolçularların müqaviləsi başa çatmışdı. Sadəcə, heç kimlə yeni sözləşmə imzalanmadı. Bu, futbolda normal haldır. Anormal hal odur ki, klub bundan sonra hardan futbolçu tapacaq? Üzdə olanların hamısı başqa klublarla müqavilə imzalayıb". Bu sözləri Sport24.az-a açıqlamasında "Şahdağ Qusar"ın kapitanı Rahid Əmirquliyev deyib.
Təcrübəli futbolçu ötən il İkinci Liqada çempion olan "Şahdağ Qusar"ın bütün futbolçularla müqaviləyə xitam verməsinə münasibət bildirib:
"Klub rəhbərliyi ilə bu barədə söhbətimiz olub. İkinci Liqada çempion olan kimi rəhbərliklə görüşdük. Söhbət zamanı bildirikdik ki, I Liqada üst pillələr uğrunda mübarizə aparmaq istəyiriksə, bəzi futbolçuları düşərgədə saxlamalıyıq. Təəssüf ki, rəhbərlikdən cavab gəlmədi. Bundan sonra nələr olacaq? Bu barədə məlumatım yoxdur. Çox istərdim ki, "Şahdağ Qusar" I Liqada da yuxarı yerlər uğrunda mübarizə aparsın. Ancaq çempionatın startına az qalıb, mənim isə heç nədən xəbərim yoxdur. "Şahdağ Qusar"ın aqibətinin necə olacağı bilinmir. Karyeramı "Şahdağ Qusar"da davam etdirmək istəyirdim. Komandaya əlimdən gələn köməyi etməyə hazıram. Digər klublardan təklifim var, amma mən hələ "Şahdağ Qusar" rəhbərliyindən cavab gözləyirəm".
Qeyd edək ki, "Şahdağ Qusar" son mövsümdə II liqada çempion olmaqla, I liqaya vəsiqə qazanıb.
