Sport24.az
"Çempionlar Liqasının liqa mərhələsinə vəsiqə qazanmaq tək "Qarabağ"ın yox, bütün Azərbaycan futbolunun qələbəsidir". Bu sözləri Sport24.az-a açıqlamasında Rahid Əmirquliyev deyib.
8 il öncə, 2017/2018 mövsümündə qitənin ən nüfuzlu klub turnirinin qrup mərhələsində iştirak etmiş "Qarabağ"ın heyətində yer alan futbolçu İspaniya nəhəngi "Real" Madrid"in gəlməsinin arzuladığını bildirib:
"Çox xoş oldu. Təmsilçimiz Çempionlar Liqasında çıxış edəcək. 8 il öncə, "Kopenhagen"lə tarixi matçda mən də heyətdə idim. Hamı istərdi ki, klublarımız hər il mötəbər turnirdə iştirak etsin. Hələ ki, bunu bacaran tək "Qarabağ"dır. İnşallah, gələcəkdə başqa klublarımızda belə nəhəng turnirlərdə iştirak edər. Çempionlar Liqasında zəif rəqib yoxdur. Mən "Real"ın azarkeşiyəm. İstəyərdim Madrid klubu ölkəmizə gəlsin. Həmin liqada iştirakın özü belə böyük işdir. Bu cür böyük klubları ölkəmizdə qarşılamaq, onlara qarşı çıxış etmək möhtəşəmdir. Onlarda futbola aid nə lazımdırsa, hər şey var. Bu, Azərbaycan futbolu, xüsusilə "Qarabağ" üçün böyük təcrübə olacaq".
Qeyd edək ki, Monakoda yerləşən inzibati binada təşkil ediləcək püşkatmaya Bakı vaxtı ilə 20:00-da start veriləcək. Azərbaycan çempionu "Qarabağ" püşkatmada dördüncü səbətdə yer alacaq.
