Idman.biz
"Qarabağ"ı çox çətin oyun gözləyir. Rəqib olduqca güclü komandadır".
Bunu "Qarabağ"ın sabiq yarımmüdafiəçisi Rahid Əmirquliyevin futbolinfo.az-a müsahibəsində deyib.
– "Qarabağ" Çempionlar Liqasının Liqa mərhələsində növbəti oyununu bu gün "Çelsi"yə qarşı keçirəcək. Matçdan gözləntiniz nədir?
– Əlbəttə ki, "Qarabağ"ı çox çətin oyun gözləyir. Rəqib olduqca güclü komandadır. İngiltərə Premyer Liqası dünyanın ən güclü liqalarından, "Çelsi" isə bu liqada çempionluğa oynayan komandalardandır. Bu mənada? "Qarabağ" evdə oynasa belə, çempionumuz üçün çətin sınaq olacaq. Digər tərəfdən, "Qarabağ" Çempionlar Liqasının Liqa mərhələsində pis çıxış etmir. Qazandığı qələbələrlə, göstərdiyi futbolla sübut edir ki, istənilən rəqibə qarşı oynaya bilər. İnanıram ki, "Qarabağ" qələbə qazana bilməsə belə, meydandan 1 xalla ayrılmağı bacaracaq. Heç-heçə də təmsilçimiz üçün yaxşı nəticə sayılar.
– "Qarabağ"ın son matçlarda çətinliklə üzləşməsi "Çelsi" ilə oyunöncəsi komandada narahatlıq yarada bilərmi?
– "Qarabağ" Liqa mərhələsinin ilk oyunlarında əla qələbələr qazandı. Düzdür, "Atletik"ə məğlub oldu, ancaq həmin matçda da pis oyun göstərmədi. Nəzərə alaq ki, Bilbao təmsilçisi də çox yaxşı komandadır. Bəli, çempionatda "Şamaxı" ilə qarşılaşmada da xal itirdilər. Amma düşünmürəm ki, bu baxımdan problemlə üzləşsinlər. Sadəcə, "Çelsi" çox güclü rəqibdir. Bu səbəbdən oyun "Qarabağ" üçün ağır keçəcək.
– Hazırkı "Çelsi" ilə 8 il öncə qarşılaşdığınız "Çelsi"ni müqayisə edə bilərsiniz? Hansı komandanı daha güclü saymaq olar?
– Bəli, bu, "Qarabağ"ın "Çelsi" ilə üçüncü oyunu olacaq. Müqayisəyə gəlincə, "Çelsi" həmişə güclü və iddialı olub. Bu mənada, o komanda ilə hazırkı "Çelsi" arasında böyük fərq olduğunu düşünmürəm. Düzdür, bizim vaxtımızdakı "Çelsi"də təcrübəli futbolçular çox idi. İndiki heyətlərində isə gənclər üstünlük təşkil edirlər. Buna baxmayaraq, London təmsilçisi iştirak etdiyi bütün turnirlərdə yüksək yerlər uğrunda oynayan komandadır.
– "Qarabağ"ın Çempionlar Liqasının Liqa mərhələsindəki ümumi çıxışını necə dəyərləndirirsiniz və belə start gözləyirdinizmi?
– "Qarabağ" Liqa mərhələsindəki uğurlu çıxışı, qələbələri ilə bizi sevindirir. İki qələbələri var, təəssüflər olsun ki, üçüncü matçda məğlub oldular. Ancaq ümumi götürdükdə "Qarabağ" Liqa mərhələsində çox yaxşı çıxış edir. Məncə, heç kim Liqa mərhələsindən öncə bu nəticəni gözləmirdi.
– Sizcə, "Qarabağ" Çempionlar Liqasında 24 komanda sırasına düşə biləcəkmi?
– Hamımız bunu istəyirik. "Qarabağ"ın Çempionlar Liqasında növbəti mərhələyə adlaması həm özü, həm də Azərbaycan futbolu üçün əla nəticə olardı. Bu komanda illərdir Avropa səhnəsində Azərbaycanı layiqincə təmsil etmək üçün əlindən gələni əsirgəmir. Bu, sevindirici haldır. Gedişat, qeydə alınan nəticələr onu göstərir ki, inşallah, "Qarabağ" "24-lük"də olacaq. Düzdür, hələ ağır oyunlar qalıb. Buna baxmayaraq, "Qarabağ"ın 24 komanda sırasına düşəcəyinə dair hər birimizdə inam var. Onlara uğurlar arzulayıram.
