Sport24.az
"Şahdağ Qusar"ın kapitanı Rahid Əmirquliyevin Sport24.az-a müsahibəsi
- İkinci Liqanın çempionu oldunuz. Hansı hissləri keçirirsiniz?
- Şükürlər olsun ki, çempion ola bildik. İştirak etdiyin liqadan asılı olmayaraq titula sahib çıxmaq sevindirici haldır. Bu, hər bir komandanın arzusudur. Biz də çox sevinirik. Düzdür, bu, mənim ilk çempionluğum deyil. Amma bunu xüsusi edən odur ki, doğma komandamla əldə etmişəm. Burada karyerama başlamışam. Klubun ilk kubokudur. Bu məni daha da sevindirir. Ümid edirəm ki, gələcək komandanı Premyer Liqada da görəcəyik.
- Çempionatın gedişində hansı çətinliklərlə üzləşdiniz?
- II Liqa bizim üçün rahat keçmədi. Məğlub olmadan birinci yeri tutsaq da, çətinliklər yaşadıq. Ağır matçlarımız oldu. "Şəfa"ya da təşəkkürlər düşür. Sonadək mübarizə apardılar. Maraq qalmışdı. II dövrədə ağır görüşlər keçirmişdik. Şükürlər olsun ki, çempionluq sevincini yaşaya bildik.
- Liqanı məğlubiyyətsiz başa vurdunuz. Uğurlu nəticənin sirri nədədir?
- Buna baxmayaraq çempionluğu sonuncu turda rəsmiləşdirdik. Bu da göstərir ki, liqada rəqabət olub. Bizim yaxşı komandamız, gənc və perspektivli məşqçimiz var. Ötən mövsümdə də heyət normal idi. Lakin çempion ola bilmədik. Mövsümü üçüncü sırada başa vurduq. Ancaq kollektivin böyük hissəsini saxladıq. Uşaqlar bir-birilərini yaxşı başa düşürlər. Bizim yaxşı, güclü komandamız var. Əsas olan odur ki, kollektivdə birlik mövcuddur.
"Şahdağ Qusar" 1-ci liqada da iddialı ola bilərmi?
- I Liqada iddialı olmaq üçün bəzi şərtlər var. Biz də istəyərik. Ancaq bu tək komandadan asılı deyil. Digər tərəfi də var. Maliyyə də nəzərə alınmalıdır. I Liqada hansı hədəflər uğrunda mübarizə aparacağımız rəhbərlik qərar verəcək. Ancaq hər komandanın fikri çempion olmaqdır. Çalışacağıq ki, ən azından yaxşı çıxış edək.
- Mövsümün sonunda klubla müqaviləniz başa çatır. Qarşıdakı planlarınız necədir?
- Sözləşməm bitir. Amma "Şahdağ Qusar" doğma klubumdur. Karyerama burada başlamışam. Baxmayaraq ki, karyeramın çox hissəsini "Xəzər Lənkəran"da keçirmişəm. Burada qalmaq istəyirəm. Növbəti ildə də komandada kömək etmək niyyətindəyəm. Rəhbərliklə söhbətimiz olacaq. Ondan sonra qərar verəcəyəm. Amma mən komandaya daxildə dəstək olmaq istəyirəm.
- "Şahdağ Qusar" ev oyunlarını Qusarda keçirmir. Növbəti mövsüm Birinci Liqadakı oyunları doğma meydanda keçirmək mümkündür?
- Biz də əziyyət çəkirik. Ev oyunlarımızı Şamaxıda keçiririk. Ən çox əziyyət çəkən isə bizim möhtəşəm azarkeşlərimizdir. Uzun yol qət edirlər, bizi tək qoymurlar. Oyunlarımız Qusarda təşkil edilsəydi, bizə və fanatlara da rahat olardı. Tərəfdarımız da tribunalarda artardı. Futbolu maraqlı edən azarkeşlərdir. Qusardakı stadion düzəlsə, lap yaxşı olar. Amma bu gedişatla çatdıra biləcəklərmi? Bilmirəm. Ümid edirəm ki, tez zamanda hazır olacaq.
