Idman.biz
"Turan Tovuz" hazırda çempionatımızın lideridir. Önəmli xallar yığıblar. Buna baxmayaraq, biz oyuna istəkli hazırlaşmışdıq. Rəqibin kimliyi bizim üçün fərq etmir. Biz hər görüşə maksimum nəticə üçün çıxırıq. Üstün futbol oynadıq, amma nəticə odur ki, rəqib iki dəfə autdan sonra vurdu və qalib gəldi. Biz rəqibin standart vəziyyətlərini bilirdik. Aut, korner...Bunları məşqlərdə də çalışmışdıq. Şans faktoru da önəmlidir. Bəzən elə qollar olur ki, onu sözlə ifadə etmək mümkün deyil. Bu da elə qollardan idi. Futbolda belə şeylər də olur. Bu oyun bizim üçün təcrübə oldu. Artıq "İmişli" ilə oyunu düşünürük".
"Şamaxı"nın kapitanı Rafael Məhərrəmli komandasının Misli Premyer Liqasının 10-cu turunda "Turan Tovuz"a 1:2 hesablı məğlubiyyətini şərh edib. Bununla yanaşı, Tovuz şəhər stadionunun ot örtüyünün yaxşı vəziyyətdə olmamasından danışıb:
"Tovuzdakı meydançada oynamaq üçün bir neçə ay da gözləməli idilər. Ancaq belə alındı. Bizim oyunumuza da təsiri oldu. 10 dəqiqədən sonra stadion yararsız vəziyyətə düşdü. Buna baxmayaraq, çalışdıq, vuruşduq. Autdan başqa rəqibə demək olar ki, ciddi epizod vermədik", - deyə sportal.az-a açıqlamasında deyib.
Məhərrəmli, komandasının turnir cədvəlinin 9-cu pilləsində deyil, daha üst pillələrdə qərarlaşmağa layiq olduğunu düşündüyünü dilə gətirib: "Əlbəttə ki, oynadığımız futbol hazırkı pilləyə uyğun deyil. Nəticə də önəmlidir, amma futbol oynamaq da bir o qədər önəmlidir. İnanıram ki, nəticəmizi daha yaxşı edib, yuxarı pillələrdə olacağıq".
26 yaşlı futbolçu növbəti turda qarşılaşacaqları "İmişli" görüşü barədə isə ümidli olduğunu söyləyib: "İmişli" çempionata çox yaxşı başlayıb. Yeni komanda olsalar da, keyfiyyətli futbolçulara sahibdirlər. Ancaq həmişə dediyim kimi, bizim üçün rəqibin kim olması fərq etmir. Çünki hər oyuna eyni istək və motivasiya ilə çıxırıq. Bu da həmin matçlardan biridir. Oyuna ən yüksək nəticə üçün çıxacağıq".
