Idman.biz
"Oyunun çətin keçəcəyini bilirdik. Axı bu, "Qarabağ"dır".
Bu sözləri səfərdə "Qarabağ"la qolsuz heç-heçə etdikləri Azərbaycan Premyer Liqasının IX tur matçından sonra "Şamaxı"nın futbolçusu Rafael Məhərrəmli sportnet.az-a müsahibəsində deyib.
Həmin müsahibəni təqdim edirik:
- Oyun haqqında nə deyə bilərsiniz?
- Oyunun çətin keçəcəyini bilirdik. Axı bu, "Qarabağ"dır. Belə komandaya qarşı oynamaq hər futbolçu üçün xüsusi hissdir. Düşünürəm ki, bu oyundan alınan bir xal bizim üçün yaxşı nəticədir. "Qarabağ"dan xal almaq hər komanda üçün arzuolunandır.
- Komanda olaraq oyunlarınızı necə dəyərləndirirsiniz?
- Ümumiyyətlə, komanda şəklində daha yaxşı olmağa doğru gedirik. Qarşıda çox oyunlarımız var və hər qarşılaşmada oyunumuzu daha da inkişaf etdirəcəyik.
- Milliyə dəvət almırsınız. Bu, sizdə hansı hissləri yaradır?
- Milli komandada oynamaq hər bir futbolçunun arzusudur. Bunun üçün sadəcə çalışmaq, əzmkarlıq göstərmək lazımdır. Qalan qərarları isə məşqçilər verir - onlar hər şeyin ən doğrusunu bilir.
- Növbəti oyun barədə nə deyə bilərsiniz?
- Növbəti oyunumuz "Turan Tovuz"la olacaq. Rəqib çox güclüdür, amma biz bu qarşılaşmaya "Qarabağ"la oyundakı eyni istəklə və motivasiya ilə hazırlaşacağıq.
- Keçən oyun evdə "Kəpəz"dən məğlubiyyət aldınız. Bu oyunlar arasında nə fərq vardı?
- Bu, futboldur. Düşünürəm ki, ötən oyunda qırmızı vərəqə çox böyük rol oynadı. Amma buna baxmayaraq, komanda yaxşı mübarizə apardı. Necə ki, bu oyuna ciddi hazırlaşmışdıq, növbəti qarşılaşmalara da eyni səviyyədə hazırlaşacağımıza inanıram.
- Premyer Liqada komanda sayının artmasının bir futbolçu kimi sizə təsiri necədir?
- Keçən mövsüm Premyer Liqada 10 komanda var idi, bu mövsüm isə 12. Məncə, bu dəyişiklik müsbət təsir edib. Rəqabət artıb, hər bir komanda daha güclü çıxış edir. Keçən il eyni komandalarla daha çox qarşılaşırdıq, indi isə rəqiblər müxtəlifdir. Bu da həm təcrübə, həm də inkişaf baxımından müsbət amildir. Hazırda liqada zəif komanda yoxdur. Hər bir rəqibə qarşı ciddi yanaşır və oyundan maksimum nəticə əldə etməyə çalışırıq.
