Sport24.az
"Mançester Siti"nin baş məşqçisi Xosep Qvardiola komandasının Çempionlar Liqasının Liqa mərhələsindəki çıxışını şərh edib. Sport24.az xəbər verir ki, mütəxəssisin komandası turnirdə 11 xalla 22-ci yeri tutub və pley-offa vəsiqə qazanıb.
Qvardiola isə "şəhərlilər"in nəticəsi haqqında danışarkən 2024/2025 mövsümündə Çempionlar Liqasının qalibi olmaq şanslarını da dəyərləndirib:
"Cari mövsüm Çempionlar Liqasını qazanacağıqmı? Hazırda bu, bizim üçün mümkün deyil. Uğurlu olduğumuz illərdə düşüncələrim yalnız qələbəyə yönəlmişdi. Mən həmişə mövcud reallığı nəzərə alaraq rasional hərəkət edirəm.
Rəqiblərimiz bizdən daha çox təcrübəyə malikdirlər. "Real" bəlkə də Liqa mərhələsində çətinlik çəkirdi. Amma son matçlarda öz oyun səviyyəsinə qayıdıb, yaxşı nəticə göstərməyə başlayıb. "Bavariya" Kompaninin rəhbərliyi altında əla mövsüm keçirir... Sabah onlara qarşı oynamalı olsaydıq, asan olmazdı. Bununla belə, bir neçə həftə ərzində vəziyyət dəyişə bilər. Rəqibimizin kim olacağı məlum deyil... Biz hərtərəfli hazırlıq görəcəyik və gələcəkdə nə baş verəcəyini görəcəyik".
Qeyd edək ki, ÇL-də pley-offun püşkü yanvarın 31-də atılacaq. Bu mərhələnin ilk oyunları 11-12 fevral tarixlərində, cavab görüşləri 18-19 fevralda keçiriləcək.
1/8 finalın püşkatma mərasimi isə fevralın 21-də olacaq. Bu mərhələnin ilk matçları 4-5 martda, cavab qarşılaşmaları isə 11-12 martda oynanılacaq.
