Idman.biz
İngiltərənin "Mançester Siti" komandasının baş məşqçisi Pep Qvardiola İngiltərə Premyer Liqasında yeni rekorda imza atıb.
İdman.Biz xəbər verir ki, 16-cı turda "Kristal Palas" üzərində 3:0 hesablı qələbə Qvardiola üçün Premyer Liqa tarixində xüsusi əhəmiyyət daşıyıb. Bu görüş onun rəhbərliyi altında komandanın çempionat matçlarında üç və ya daha çox qol vuraraq qazandığı 150-ci qələbə olub. İspan mütəxəssis bu nəticəyə 358 oyun ərzində nail olub.
Beləliklə, Qvardiola bu göstəricidə əfsanəvi Aleks Ferqyusonu geridə qoyub. Şotlandiyalı mütəxəssis Premyer Liqada üç və daha çox qol vurulan 149 qələbəni 522 matçda əldə etmişdi. Məlumat "Mançester Siti"nin rəsmi saytı tərəfindən açıqlanıb.
Qeyd edək ki, Xosep Qvardiola "Mançester Siti"ni 2016-cı ildən çalışdırır. Bu müddət ərzində o, klubu altı dəfə İngiltərə Premyer Liqasının çempionu edib.
Cari mövsümdə 16 turdan sonra "Mançester Siti" 34 xal toplayaraq turnir cədvəlində ikinci pillədə qərarlaşıb. Komanda eyni sayda oyun keçirdiyi lider "Arsenal"dan iki xal geri qalır.
