Sport24.az
Azərbaycan 2-ci Liqasının 24-cü turunda "Şəfa" ilə qarşılaşan (0:0) "Şahdağ Qusar"ın baş məşqçisi Elnur Abdullayev oyunu şərh edib. O, mətbuat konfransında belə danışıb:
"Bura gələndə məqsəd birinci liqaya yüksəlmək və çempionluq idi. İlk vəzifəni yerinə yetirmişik, bu gün də çempionluğa doğru önəmli addım atdıq. Düzdür, qızıl medalları tam təmin etməmişik. İnanıram ki, bunun da öhdəsindən gələcəyik. Bu gün əla atmosfer var idi. Mən "Xəzər Lənkəran"da belə ab-havada oynamışam, azarkeşin dəstəyinin nə olduğunu bilirəm. Tərəfdarlarımıza minnətdaram. Bu gün güclü rəqiblə qarşılaşdıq. İstək mənim üçün önəmlidir. Komandam da çox istəkli idi və onlara təşəkkür edirəm".
Çalışdırıcı növbəti mövsümlə bağlı geniş danışmayıb: "Birinci Liqa ilə bağlı planlarımız barədə hələ heç nə deyə bilmərəm. Çox istərdim ki, ev oyunlarımızı Qusarda keçirək. Çünki belə azarkeşin qarşısında oynamaq qarşılaşmaya 1:0 öndə başlamaq deməkdir. Amma stadionla bağlı konkret nəsə deyə bilmərəm. Məlumatım olsaydı, cavablandırardım".
