Qurban Qurbanov "Şkendiya" ilə səfər oyunundakı qələbənin əhəmiyyətini vurğuladı

"Futbolçularımız sona kimi mübarizə apardılar".

İdman.biz xəbər verir ki, bunu "Qarabağ"ın baş məşqçisi Qurban Qurbanov Çempionlar Liqasının III təsnifat mərhələsinin ilk oyunundan sonra deyib.

Təcrübəli mütəxəssis səfərdə "Şkendiya" ilə görüşdə qazanılmış 1:0 hesablı qələbəni şərh edib: "Futbolçularımıza təşəkkür edirəm, sona kimi mübarizə apardılar. Belə matçlarda axıra qədər oyundan qopmamaq çox vacibdir. Futbolçularımız nəticə üçün oynamağı bacardılar, onları təbrik edirəm. Rəqib barədə də xoş sözlər demək istəyirəm. Əvvəlki mərhələdə hər iki görüşdə qalib gəlmişdilər. Bugünkü çıxışları ilə sübut etdilər ki, hər iki matçda çox güclü komanda üzərində layiqli qalibiyyət əldə etmişdilər. Bizə də çox gərginlik yaratdılar. Belə rəqibə qarşı səfər oyunundan qələbə ilə dönmək böyük üstünlükdür. Amma Bakıda daha diqqətli və ciddi olmalıyıq. Çünki qarşımızda məğlubiyyəti sevməyən kollektiv var".

Qurban Qurbanov azarkeşlərin stadionda gözəl atmosfer yaratdıqlarını söyləyib: "Futbolun yaraşığı azarkeşdir, bu cür atmosferdir. Belə yaxşı stadionda bu qədər azarkeşin olması matçı daha da gözəlləşdirmişdi. Bu ab-hava "Şkendiya" komandasına da əlavə motivasiya vermişdi. Gözəl atmosferə və baxımlı oyuna görə həm yerli azarkeşlərə, həm də rəqib komandaya təşəkkür edirəm".

Qeyd edək ki, komandalar arasında cavab oyunu avqustin 12-də Bakıda keçiriləcək.

İdman.biz