Idman.biz
"Futbolçularımı təbrik edirəm. Çox vacib qalibiyyət idi. Dünən də demişdim ki, rəqib bu meydanda bizə istənilən an gərginlik yarada bilər. Bu gün bunun şahidi olduq".
İdman.biz xəbər verir ki, bunu Çempionlar Liqasının II təsnifat mərhələsinin ilk oyunları çərçivəsində "Şelburn"la oyundan sonra "Qarabağ" baş məşqçisi Qurban Qurbanov deyib.
Təcrübəli mütəxəssis oyunsonrası mətbuat konfransında səfərdə qazanılan böyükhesablı qələbəni şərh edib: "3:0 hesabı ilə qalib gəlməyimizə baxmayaraq, bunu yaddan çıxarıb, cavab görüşünə daha ciddi hazırlaşmalıyıq. Az sayda azarkeşlərimiz gəlmişdi. Bizi dəstəklədikləri üçün hər birinə təşəkkür edirəm".
Baş məşqçi cavab qarşılaşmasına da eyni ciddiyyətlə hazırlaşacaqlarını söyləyib: "Cütün taleyinin həll edildiyini qətiyyən düşünmürəm. "Şelburn" məğlub olmağı xoşlamayan, meydanda nə etdiyini bilən kollektivdir. Bəlkə də, bizə uyğun olmayan sürətdə çıxış edirdi. Amma müdafiəçilərimiz rəqibin hücumçularına imkan vermirdilər. Bakıdakı matçda bugünkündən daha diqqətli olmalıyıq. Bu, bizim cari mövsümdə ilk oyunumuz idi. İnanıram ki, qarşıdakı matçlarda daha yaxşı olacağıq".
Qeyd edək ki, komandalar arasında cavab oyunu iyunun 30-da Bakıda olacaq.
İdman.biz
