Qurban Qurbanov: "Yubanma? Çox böyük təsiri oldu"

"Rəqibi təbrik edirəm. Bəlkə də belə hesab olmammalı idi. Xeyli sayda qol imkanımız oldu, ancaq realizə edə bilmədik. Futbolçularıma iradım yoxdu, ancaq hesab edirəm ki, daha yaxşı ola bilərdilər".

Bu sözləri Avropa Liqasının Liqa mərhələsinin ilk oyununda İngiltərədə "Tottenhem"ə 0:3 məğlub olan "Qarabağ"ın baş məşqçisi Qurban Qurbanov oyunsonrası mətbuat konfransında deyib. Sport24.az xəbər verir ki, təcrübəli mütəxəssis daha sonra sualları cavablandırıb.

- Qeyd etdiniz ki, futboçularınız daha yaxşı ola bilərdilər. Konkret hansı komponentləri nəzərdə tutursunuz?
- Futbolçularımda həyəcan var idi. Dünən də dedim ki, dünya futbolunun ən güclü çempionatının iştirakçısına qarşı oynayacağıq. "Tottenhem" ölkə çempionatında daim liderlər qrupunda olur. Bunu futbolçularımız da bilirdi. Məncə, həyəcan mane oldu. Bəli, kifayət qədər təcrübəmiz var, ancaq bəzi oyunçularımız indi-indi bu səviyyədə oynamağa başlayır. Rəqibin ustalığı bizə qalib gəldi. Say üstünlüyü əldə etdikdən sonra bəlkə də futbolçularımız bir qədər arxayınlaşdı. Sadə qollar buraxdıq. Onlara qol vurmaq üçün şəraiti biz yaratdıq. Bəlkə də daha yaxşı nəticə ola bilərdi.

- Tıxaca görə 35 dəqiqə yubandınız. Bu, nə dərəcədə futbolçularınıza təsir etdi?
- İstər-istəməz iki saat yarım oturaq vəziyyətdə avtobusda gələn oyunçunun konsentrasiyası pozulur. Sadəcə, bunu səbəb, bəhanə kimi göstərmək istəmirəm. Belə bir böyük turnirdə belə hallar olmalı deyil. Ancaq bu ölkənin öz qayda-qanunları var ki, polis müşayiəti təqdim olunmur. Belə turnirdə polisin müşayiəti mütləq olmalıdı. Çox böyük təsiri oldu. İstəmirəm ki, rəqibin qələbəsinə kölgə salım. Rəqib üstün idi. Təsəvvür edin ki, stadiona çatdından 40 dəqiqə sonra dedilər oyun başlamalıdı, heç hazırlaşmağa vaxtımız da olmadı. Bu cür hadusələr çox nadir hallarda yaşanır. Yəqin ki, üzürlü sayılmalıdır.