Qurban Qurbanov: "Bu, Azərbaycanın "Qarabağ"ı idi"

"Çətin vəziyyətin öhdəsindən gəldik. Futbolçular çox yaxşı komandanı mübarizədən kənarlaşdıra bildilər.

İdman.biz xəbər verir ki, bunu "Qarabağ"ın baş məşqçisi Qurban Qurbanov deyib.

Təcrübəli mütəxəssis Çempionlar Liqasının III təsnifat mərhələsində "Lüdoqorets" üzərində qazanılan 7:2 hesablı qələbəni şərh edib: "Futbolçular oyundan həzz almağı bacardılar. Qarşılaşmanın əvvəlində zədələr alacağınmızı gözləmirdik, amma bəzən belə olur. İki vacib oyunçunu dəyişməli olduq. Futbolçular çətin anda xarakter nümayiş etdirdilər. Biz vahid və güclü komanda olduğumuzu göstərdik. Çempionlar Liqasının əsas mərhələsinə yüksəlmək arzusundayıq. Pley-offda "Dinamo" (Zaqreb) kimi çətin rəqibə qarşı oynayacağıq".

Qurban Qurbanov gərgin oyunların komandanı böyütdüyünü deyib: "Rəqibin ən üstün cəhəti olan əks-hücumlarda bir az diqqətsiz olduq. Amma getdikcə oyunu ələ almağı bacardıq. Mən ümidsiz deyildim. Belə sınaqlardan çox keçmişik. Belə gərgin oyunlara dözmüşük. Bildirmişdim ki, 120 dəqiqə dözməyi bacarmalıyıq. Futbolçularıma əhsən düşür. Azarkeşlərimizi, Azərbaycanı təbrik edirəm. Qalibiyyət öz yerində, bu cür oyunlar həm futbolçuları böyüdür, həm klub olaraq böyüyürük, həm daha xarakterli oluruq. Azarkeşlərdə adrenalin görəndə daha çox sevinirəm. Həqiqətən elə oyun idi, sanki bir triller idi. Bu, həqiqətən mənim "Qarabağ"ım idi, Azərbaycanın "Qarabağ"ı idi".

Qeyd edək ki, "Qarabağ" iki oyunun nəticəsində görə "Lüdoqorets"i mübarizədən kənarlaşdıraraq, pley-offa yüksəlib.

İdman.biz