Sport24.az
"Qarabağ"ın baş məşqçisi Qurban Qurbanov Avropa Liqasında "Elfsborq"a uduzduqları oyundan sonra fikirlərini bölüşüb. Sport24.az xəbər verir ki, mütəxəssis 0:1 hesabıyla bitən matçla bağlı bunları deyib:
– Yaxşı müdafiə olunan komandaya qarşı oynadıq. Əfsuslar olsun, məğlub olduq. Qələbə üçün bura gəlmişdik. Futbolçularım sona kimi mübarizə apardılar. Futbol kiçik və kobud səhvlər üzərində qurulub. Ani diqqətsizlikdən qol buraxdıq. Hər bir halda, futbolçulara təşəkkür etmək istəyirəm. Bu il çox əziyyət çəkdilər. İrəli baxmalıyıq. Builki avrokubok oyunları yaxşı təcrübə oldu. Pozitiv düşünərək, önə baxmalıyıq. Rəqibi təbrik edirəm. İstəkli idilər və qalib gəldilər.
– Oyun planınız nə dərəcə alındı?
– Müdafiəni həmişə öndə qurmaq istəyirik. Bu gün də prinsiplərimizdən əl çəkmədik. Hücuma daha çox diqqət ayırırdıq. Qarşımızda 10 nəfərlə əla müdafiə olunan komanda var idi. 2-3 dəfə əks-hücumda bizi yaxaladılar. Bütün diqqətimiz hücumda idi.
– Komandanın növbəti mərhələ şansları demək olar, yoxdur. Turnirdəki çıxışınızı necə dəyərləndirirsiniz?
– Xeyli məğlubiyyətlərimiz olub. Hər məğlubiyyət uğursuzluqdur. Lakin indi bu haqda düşünmək lazım deyil. Pozitiv fikirləşib, irəli baxmalıyıq. Qruplarda oynamasaydıq, bizimçün uğursuzluq olardı. Bu gün futbol elə səviyyəyə gəlib ki, hər şeyə hazır olmalısan. Bəzən böyük klublarda da uğursuzluqlar olur. Bu, futbolun silinməyən qanunlarındandır. Futbolda elə qayda yoxdur ki, hər il yaxşı səviyyədə olmalısan. Lakin bununçün çalışır, hazırlaşırıq. Bəzən futbolçuların yorulmuş halları olur. Hər uğursuzluqdan sonra komanda digər bir neçə ilə daha möhkəmlənir. Bir şeyi bilin ki, ürəkdən uğur qazanmaq istəyirik. Sadəcə bəzən alınmır. Belə hallara hazır olmalıyıq.
– Komandada yorğunluq hiss olunurdu… Düşünmürsünüz ki, əvəzedicilərdə gecikdiniz?
– Hər il çalışırıq ki, komandaya yeni oyunçular cəlb edək. Bu gün müdafiədə oyunçu qalmamışdı. Hər iki mərkəz oyunçumuz zədələnib. Belə maçlarda müdafiə xətti önəmlidir. Axtarışdayıq və qış fasiləsində yenilik etmək istəyirik. Gedişata baxacağıq, alınsa, bir neçə oyunçunu kollektivə götürəcəyik.
