Qurban Qurbanov: "Bakıdakı oyunda daha ciddi olmalıyıq, arxayınlaşmalı deyilik"

Çempionlar Liqasının pley-off mərhələsinin "Ferentsvaroş" (Macarıstan) – "Qarabağ" oyunundan sonra Azərbaycan təmsilçisinin baş məşqçisi Qurban Qurbanov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…

– Futbolçularımı təbrik edirəm. Gərgin oyun olmasına baxmayaraq, bu qədər azarkeş önündə sona kimi dözdülər, qalib gəlmək üçün ən yaxşısını etməyə çalışdılar. Azarkeşlərimizə təşəkkür edirəm, burda bizi tək qoymadılar. Eləcə də rəqib komandanın fanatlarına təşəkkür edirəm, stadionda yaxşı atmosfer var idi. Hesab bizi aldatmalı deyil. Bəli, üstünlüyümüz var, amma Bakıdakı oyunda daha ciddi, diqqətli olmalıyıq. Rəqibin elə oyun üslubu var ki, heç nədən qol vurmağı bacarırlar. Hər bir halda, ikinci oyunda daha ciddi olacağıq və şansımızdan maksimum istifadə etməyə çalışacağıq.

– Buraxdığınız qol sizi həvəsdən saldı?

– Səfərdə qol buraxanda bir az komandada həyəcan çoxalır. Qoldan sonra da bir 10-15 dəqiqə üzərimizdə təzyiq çoxaldı. Lakin getdikcə oyunu ələ aldıq və ikinci hissədə də riskə getdik. İlk hissədə qol vurmaq istəyirdik, ikinci hissədə isə daha çox qol üçün həvəsliydik. Qol buraxmaq istəməzdim. Amma futbolçulardan tələbim maksimum çox qol vurmaqdır.

– Özünüzü Liqa mərhələsində hiss edirsiniz?

– Qətiyyən yox. Qarşımızda çox ciddi, istəkli, məğlub olmağı xoşlamayan baş məşqçi və komanda var. Yenə deyirəm, rəqibin istənilən standart vəziyyətlərdə, hücumda qol vurmaq bacarığı var. Bakıdakı oyunda daha ciddi olamlıyıq, arxayınlaşmalı deyilik. Hər buraxılan qol komandada inamsızlıq yaradır. Bakıda daha ciddi olmalıyıq. Bu oyunu bayram etməli deyilik.