Idman.biz
"Oyuna çox yaxşı başladıq. Yaxşı hücumlarımız oldu. Sadəcə, dəqiqlik çatmadı. Rəqibin ustalıq keyfiyyəti bizdən daha yüksək idi".
İdman.Biz xəbər verir ki, bunu "Qarabağ"ın baş məşqçisi Qurban Qurbanov UEFA Çempionlar Liqasının əsas mərhələsinin III turunda "Atletik"ə qarşı keçirdikləri oyundan sonra mətbuat konfransında deyib.
"Atletik" 90 dəqiqə ərzində presinq edə bilir və futbolçularımız "Benfika" ilə oyuna nisbətən daha çox təzyiq altında qaldılar. Hücumda yaxşı oynamağımıza baxmayaraq, oyunu istədiyimiz kimi bitirə bilmədik. Bizim liqada belə güclü təzyiq yoxdur, İspaniya çempionatında isə onlar buna daha çox öyrəşiblər. Rəqib səni səhvlərə məcbur edir", - Qurbanov bildirib.
Baş məşqçi turnirdə keçirəcəkləri oyunlardan da danışıb: "Mübarizəmizi davam etdiririk. Rəqiblər də xal qazanmaq üçün qalib gəlmək, növbəti mərhələyə adlamaq üçün şanslarını artırmaq istəyəcəklər. Hər şeyə hazır olmalıyıq. Qarşıdakı görüşlərdə daha intizamlı oynamalıyıq".
Qeyd edək ki, "Atletik" – "Qarabağ" matçı ev sahiblərinin 3:1 hesablı qələbəsi ilə bitib.
