Sport24.az
"Oyuna nəzarət edən tərəf biz idik. 2 penalti oldu və rəqib onları qola çevirdi. Bəxt bu qarşılaşmada bizdən yana deyildi". Bu sözləri Sport24.az-a açıqlamasında "Zirə"nin qapıçısı Aydın Bayramov deyib.
Qolkiper "Araz-Naxçıvan"a 0:2 hesabı ilə uduzduqları Azərbaycan Kubokunun cavab oyunu ilə bağlı fikirlərini bölüşüb.
"Ümumiyyətlə hər iki matçda çoxlu hücumlarımız oldu. Bunlardan istifadə edə bilmədik. Hərdən futbolda belə oyunlar olur".
Bayramov "çempionatda bu rəqibi üstələyərək məğlubiyyətin əvəzini çıxmaq istəyərsinizmi" sualını bu cür cavablandırıb:
"Xeyr. Kiməsə qarşı qəsd-qərəzimiz yoxdur. Sadəcə, öz işimizi görməliyik. Matçlara köklənib sonda avrokubok zonasında olmağı hədəfləmişik.
O, Premyer Liqanın növbəti turunda "Turan Tovuz"a qarşı keçirəcəkləri görüşə də toxunub:
"Ağır səfər qarşılaşmasına çıxacağıq. Həm yol, həm azarkeş, həm də meydan amili bizə qarşı olacaq. Amma futbolun gözəl tərəfləri bunlardır. Turnir cədvəli baxımından çox əhəmiyyətli matçdır. Bu səbəbdən maksimum konsentrasiya ilə bu oyuna hazırlaşırıq".
