Sport24.az
"Sumqayıt səfəri hər zaman rəqiblər üçün çətin olur. Biz də ağır qarşılaşma olacağını bilirdik". Bu sözləri Sport24.az-a "Zirə"nin kapitanı Qismət Alıyev deyib.
28 yaşlı yarımmüdafiəçi "Sumqayıt"a 3:0 hesabı ilə qalib gəldikləri Misli Premyer Liqasının XXIII turunun oyunu ilə bağlı fikirlərini bölüşüb:
"Rəqibimiz son matçlarda yaxşı oyun sərgiləsə də, qələbə qazana bilməyib. Biz də "Neftçi"yə uduzduğumuz görüşdən sonra toparlana bildik və çox vacib qalibiyyət əldə etdik".
Komandanın kapitanı XXIV turda "Kəpəz"ə qarşı keçirəcəkləri qarşılaşma haqqında da fikirlərini bölüşüb:
"Gəncə klubu mövsümün ikinci yarısına çox inamlı başlayıb. Heyətlərində istər təcrübəli, istərsə də yaxşı gənc futbolçular var. Bu il çox önəmli qələbələr əldə ediblər. "Sabah"ı və "Turan Tovuz"u məğlub ediblər. Komanda olaraq bu matça da çox istəklə hazırlaşırıq. Bizim və rəqib üçün də vacib bir oyundur".
Qeyd edək ki, fevralın 23-də təşkil olunacaq "Zirə" - "Kəpəz" matçı saat 17:00-da start götürəcək.
