Sport24.az
"Gərgin və maraqlı oyun alındı. Matçın belə keçəcəyini bilirdik. Vacib üç xal əldə etdik". Bu sözləri Sport24.az-a açıqlamasında "Zirə"nin futbolçusu İsmayıl İbrahimli deyib.
27 yaşlı yarımmüdafiəçi "Səbail"ə 1:0 hesabı ilə qalib gəldikləri Misli Premyer Liqasının XXVI turunun oyunu ilə bağlı fikirlərini bölüşüb:
"Çox yaxşı hücumlarımız oldu. Son dəqiqəyə kimi qol vurmaq şansımız var idi. Bir neçə dəfə top qapı dirəyindən geri qayıtdı. Amma sonda qalibiyyət qolunu vura bildik".
İsmayıllı avrokuboka vəsiqə qazanmaq üçün mübarizə apardıqlarını bildirib:
"Hələ ki, heç nə həll olunmayıb. Hər turun, matçın bizim üçün vacib olduğunu başa düşürük. İstədiyimiz nəticəni əldə etmək üçün sonadək mübarizə aparacağıq".
O, XXVII turda "Sabah"a qarşı keçirəcəkləri görüşə də toxunub:
"Rəqibin gücünü bilirik. Çətin səfərə yollanacağıq. Qələbə qazanmaq üçün əlimizdən gələni edəcəyik".
Qeyd edək ki, martın 15-də təşkil olunacaq "Sabah" - "Zirə" matçı saat 19:30-da start götürəcək.
