İdman.biz
"Turan Tovuz"un futbolçusu Denis Marandiçinin durumuna aydınlıq gəlib.
İdman.biz xəbər verir ki, bunu klubun mətbuat xidməti açıqlayıb.
Azərbaycan kubokunun 1/8 final mərhələsinin "Sabah"la oyununda zədə alaraq matçı tərk edən 28 yaşlı moldovalı müdafiəçi dərhal Tovuz Rayon Mərkəzi Xəstəxanasına çatdırılıb. Zədəsi ağır olduğundan Denis ilkin təcili yardımdan sonra Gəncə Mərkəzi Klinikasına çatdırılıb.
Legionerdə fibula sümüyünün tam yerini dəyişmiş sınığı və tibia sümüyünün yerdəyişməmiş sınığı aşkarlanıb. Onun ayağı gipsə qoyulub.
Klub həkiminin və xəstəxananın rəyinə əsasən futbolçunun Bakı şəhərində əməliyyat olunması nəzərdə tutulub. Cərrahi müdaxilənin vaxtı ayağa toplanan hematomanın sovrulmasından sonra müəyyənləşəcək. Ehtiyac duyularsa futbolçunun əməliyyatı ölkə xaricində həyata keçiriləcək.
Qeyd edək ki, "Turan Tovuz" "Sabah"la görüşün penaltilər seriyasında uduzub – 2:2, p. 1:3.
İdman.biz
