"İki ildi "Turan Tovuz"dayam. Burda çox ciddi işlər görülüb. Ona görə də rəhbərliklə oturub söhbət etdik və daha bir 1 il komandada qalmağa qərar verdim". Bu sözləri Sport24.az-a açıqlamasında "Turan Tovuz"un kapitanı Şəhriyar Əliyev deyib.
Təcrübəli müdafiəçi yeni baş məşqçi təyinatına da münasibət bildirib: "Kurban Berdıyev yeni baş məşqçi təyin olunsa da, hələ onunla görüşümüz baş tutmayıb. Amma qiyabi olaraq bilirəm ki, çox təcrübəli və nəticə verən mütəxəssisdi. Komanda iyunun 24-ü və ya 25-i bir araya gələcək. Berdıyevi də həmin vaxt görəcəyik".
Əliyev hazırda davam edən AVRO-2024-lə də bağlı fikirlərini bölüşüb: "İspaniyaya azarkeşlik edirəm və onları finalda görürəm. Amma hərdən içimdən Türkiyə millisinin də bütün oyunlarda qələbə qazanıb maksimum irəli getməsi də keçir. Ümumilikdə İngiltərə, İspaniya və Almaniyanı turnirin favoritləri hesab edirəm. Düşünürəm ki, bu 3 seçmədən biri çempion olacaq".
POLAD AZƏR