Sport24.az
"Hər bir oyun mənim üçün yeni bir təcrübə və karyeramda irəli addımdır. Oynadıqca həm də özgüvənim artır. "Turan Tovuz" kimi komandanı tovuzlu futbolsevərlərin qarşısında məğlub etmək qələbə həyəcanverici oldu. Karyerama belə bir qalibiyyət yazıldığı üçün çox şadam". Bu sözləri Sport24.az-a açıqlamasında "Sumqayıt"ın qapıçısı Xəyal Fərzullayev deyib.
Son oyunlarda "kimyaçılar"ın əsas heyət üzvünə çevrilən gənc qolkiper qarşıdakı planları barədə də danışıb:
"Yeni-yeni oynamağa başlamışam. Təbii ki, uzun müddətli planlarım var, amma bu gün yalnız növbəti matç barədə düşünürəm. Baş məşqçimiz Vaqif Cavadov mənə güvəndiyi müddətdə onun etimadını doğrultmaq üçün əlimnən gələnin ən yaxşısını edəcəm".
U-21 millisinə çağırılan futbolçu toplanışa dəvət olunmasına münasibət bildirib:
"15 yaşımdan mütəmadi olaraq müxtəlif yaş qrupları üzrə millilərin toplanışlarına dəvət almışam. O formanı geyinmək hər bir azərbaycanlının xəyalı və arzusudu. Məni ora layiq bilib dəvət edən hər kəsə təşəkkür edirəm. Ümid edirəm etimadlarını doğruldacam".
