Sport24.az
"Sumqayıt" Futbol Klubu xaricdən gətirilən mallarla əlaqədar Gömrük Bəyannaməsi verib, bəyannamədə texniki səhvə yol verildiyi üçün Mərkəzi Bank malların ölkəyə gətirilməməsi ehtimalı səbəbindən inzibati xəta halının olub-olmaması ilə bağlı məhkəməyə müraciət edib. Bu, sadəcə inzibati xəta faktının olub-olmamasının araşdırılması məqsədilə edilib". Bu sözləri Sport24.az-a açıqlamasında "Sumqayıt"ın mətbuat katibi Zaur Xudiyev deyib.
Ötən gün mətbuatda Sumqayıtın eyniadlı klubunun valyuta tənzimi qaydalarını pozma ittihamı ilə məhkəmə qarşısına çıxarıldığı xəbəri yayıllıb.
Mərkəzi Bank tərəfindən klub barəsində İnzibati Xətalar Məcəlləsinin 430.4-cü (Valyuta tənzimi qaydalarının pozulması, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə) maddəsinə əsasən cərimə protokolu tərtib edilib. İddiaya əsasən, futbol klubu xidmət almaq üçün avans yolu ilə ölkə xaricinə valyuta çıxarıb. Lakin hər hansı xidmət almayıb və həmin valyuta ölkəyə geri qaytarılmayıb. Daha sonra protokol baxılması üçün Sumqayıt Şəhər Məhkəməsinə göndərilib.
Klub rəsmisi yaşananları texniki səhv adlandırıb, prosedur qaydasına uyğun olaraq məhkəməyə verildiklərini vurğulayıb: "Mərkəzi Bankın tələbi ilə klub tərəfindən Dövlət Gömrük Komitəsinə gətirilən malların Bəyannaməsi ilə bağlı korreksiya üçün müraciət ünvanlayıb və DGK-nın razılığı ilə müvafiq düzəliş edilib. Bu istənilən qurum və təşkilatın qarşılaşa biləcəyi sadə, gündəlik texniki çətinlikdir və məhkəməyə müraciət isə prosedur qaydadır".
