İdman.biz
"Sumqayıt"ın kapitanı Vüqar Mustafayev Sportal.az saytına müsahibəsi
- Geridə qalan həftədə "Sumqayıt" "Sabah" üzərində qələbə qazanmağı bacardı. Həmin oyunu necə şərh edərdin? Son dəqiqələrə qədər qələbə qazanacağınıza yəqin ki, inanırdın?
- Rəqibi yaxşı bilirdik, yaxşı tanıyırdıq. "Sabah" keyfiyyətli komandadı. Matça da ona görə hazırlaşmışdıq. Evdə azarkeşlərimizi sevindirmək istəyirdik. Şükürlər olsun ki, son dəqiqəyə kimi mübarizə apardıq və əlavə dəqiqələrdə qol vurub, qələbə qazandıq. Bəli, komanda olaraq qələbəyə inanırdıq.
- Hazırda komanda altıncı pillədə qərarlaşıb. Bu məqam sizi qane edir, yoxsa məqsəd daha yuxarı pillələrdir?
- Hələ qarşıda oyunlar çoxdur. İndiki durumda bizi nəyin qane edib-etməyəcəyini deyə bilmirəm. Çalışacağıq ki, addım-addım yuxarı pillələrə yüksələk. Bunun üçün də mübarizə aparacağıq.
- Samir Abasovun gedişi və Vaqif Cavadovun gəlişi komandada çox şey dəyişib? Cavadov nəyi dəyişə bilib?
- Hər məşqçinin öz fəlsəfəsi var. Nəyin dəyişib, nəyin dəyişmədiyini mən deyə bilmərəm. Biz məşqçilərin bizə verdiyi tapşırıqlarıbı yerinə yetirməyə çalışırıq.
- Vaqif Cavadovun oyun fəlsəfəsi, tələbləri Abasovdan daha çox fərqlənir?
- Yuxarıda dediyim kimi, hər məşqçinin öz fəlsəfəsi var. Çalışırıq ki, bizə deyilənləri meydanda yerinə yetirək. Onları nə dərəcədə düzgün edib-etmədiyimizi yenə məşqçi bizə deyir.
- Növbəti turdakı rəqibiniz "Araz-Naxçıvan" klubudur. Bu mövsüm rəqibiniz çox iddialı görünür. Necə düşünürsən, onları məğlub etmək mümkün olacaq?
- "Araz-Naxçıvan" bu sezon çox yaxşı təsir bağışlıyır. Səhv etmirəmsə 10 turdur ki, məğlub olmayıblar. Ciddi rəqibdir, ona görə hazırlaşacağıq. Bu oyundan sonra milli fasilə var. Həmin fasiləyə yaxşı nəticə ilə yollanmaq istəyirik. Ümid edirəm ki, komanda olaraq bu oyunda da yaxşı nəticə üçün mübarizə aparacağıq. Komandamıza çox inanıram.
- 2019-cu ildən "Sumqayıt"da oynayırsan. Maraqlıdır, heç komandanı tərk etmək imkanın olmayıb?Yoxsa, karyeranı elə bu klubda başa vurmaq niyyətindəsən?
- Karyeramla bağlı hələ ki, qəti qərar verməmişəm. Neçə ildir ki, artıq komandadayam. Burada çox yaxşı günlərim keçib. "Sumqayıt" qalıb- qalmamağım əsasən rəhbərlik və məşqçilər heyətindən aslıdır. Ötən sezonun ortalarında komandanı tərk etmək imkanı olmuşdu. Qazaxıstan klubu mənim üçün təklif göndərmişdi. Özü də, "Sumqayıt"a. Amma mən burada qalmaq istədim, məsləhət bildim ki, "Sumqayıt"da qalım.
- "Sumqayıt"da kapitan sarğısını daşıyırsan, daimi oynayırsan, amma milliyə heç dəvət edilmirsən...
- Millidə oynamaq, milliyə dəvət almaq hər bir futbolçu üçün şərəfdir. Mənə qaldıqda, nə yalan deyim millidən dəvət gələcəyini düşünmürəm. Çünki özümü ona hazır hiss etmirəm. Özümü millidə oynamağa layiq bilmirəm!
İdman.biz
