"Sumqayıt"ın futbolçusu: "Son nöqtəni qoymaqda çətinlik çəkirik"

"Sumqayıt"ın futbolçusu Ayxan Süleymanlının Sport24.az-a müsahibə verib.

- "Araz-Naxçıvan"la görüşdə bir xal qazana bildiniz. Oyun barədə fikirlərin necədir?

- Qolsuz olsa da, maraqlı oyun alındı. İki fərqli hissənin şahidi olduq. İlk yarıda daha çox hücum edən tərəf biz idik. İkinci hissədə isə yorğunluq özünü göstərdi. Mübarizəli, gərgin oyun keçdi

- İlk hissəni hücumda keçirdiniz. Qalibiyyət qolunu vurmaq üçün nə çatmadı?

- Bəli, birinci hissədə çoxsaylı hücumlarımız oldu. Amma son nöqtəni qoymaqda çətinlik çəkirik. Ən çox da qapıya zərbələrdə dəqiqləyimiz çatmır. Bu, ən böyük problemimizdir. Üzərində işləyəcəyik.

- Son 5 oyundur həm qalib gələ, həm də qol vura bilmirsiz. Səbəbi nədir?

- Son zərbələrdə problemimiz var. Futbolda belə hallar olur. Baş məşqçimiz Vaqif Cavadov bunu bizə çatdırır. İnşallah, qısa vaxtda bu çatışmazlığı da aradan qaldırarıq.

- Artıq sabah kubok oyununda "Sabah"la qarşılacaqsınız. Qarşıdakı matç barədə nə düşünürsünüz?

- Bu ay sıx qrafikimiz var. 3-4 gündən bir meydana çıxmalıyıq. Kubok və ya Premyer Liqa. bizim üçün fərqi yoxdur. Çalışacağıq "Sabah"la oyunda qələbə qazanaq.

- Avropaya düşmək üçün hansı yol daha asandır? Kubok, yoxsa çempionat? Ümumiyyətlə, "Sumqayıt"ın avrokuboklara vəsiqə qazanmaq şanslarını necə dəyərləndirirsiniz?

- Əlbəttə, şansımız var. Ancaq həm kubokda, həm də çempionatda yolumuz asan deyil. Premyer Liqada avrokuboklara vəsiqə verən pillələrlə aramızdakı xal fərqi böyük deyil. Hər iki cəbhədə maksimum nəticə əldə etmək istəyirik. Necə alınacağını zaman göstərəcək. Biz inanırıq.