Sport24.az
"Sumqayıt"ın yeni transferi, dominikanlı yarımmüdafiəçisi Ronaldo Vaskes AZƏRTAC-a danışıb. Sport24.az həmin müsahibəni təqdim edir.
- Əvvəlcə "Sumqayıt"a keçidiniz barədə fikirlərinizi bilmək maraqlı olar. Necə oldu ki, bu komandaya transferiniz baş tutdu?
- Agentim mənə Azərbaycandan təklif olduğunu söylədi. Əvvəlcə ailəmlə məsləhətləşdim. Qısa araşdırmadan sonra ölkəniz və çempionatla tanış oldum. Sonra isə menecerimə təklifi qəbul etmək istədiyimi bildirdim. Beləcə, transfer reallaşdı.
- Azərbaycana gələnədək ölkəmiz haqqında nə bilirdiniz?
- Təbii ki, Azərbaycan haqqında müəyyən məlumatım var idi. Daha çox ölkənizin gözəl mənzərəli yerləri haqqında eşitmişdim.
- Artıq 2 həftəyə yaxındır Azərbaycandasınız. Ölkəmiz və futbolumuz haqqında təəssüratlarınız necədir?
- Azərbaycana gəldiyim üçün peşman deyiləm. Burada inkişaf etmiş ölkə və Sumqayıt kimi gözəl şəhər gördüm. Ölkə futbolu haqqında da fikirlərim müsbətdir.
- Bəs yeni klubunuz "Sumqayıt" haqqında nə deyə bilərsiniz?
- "Sumqayıt" istedadlı və keyfiyyətli oyunçulardan təşkil olunmuş Mehriban kollektivdir. Komandamız daim inkişaf etməyə can atır və bunu hər oyunda göstərir.
- "Sumqayıt"ın heyətində artıq 2 oyunda meydana çıxmısınız. Tam hazır olmaq üçün sizə nə qədər vaxt lazımdır?
- Ümid edirəm ki, bunun üçün çox vaxt lazım olmayacaq. Yeni komandama və oyun üslubuna tam uyğunlaşmalıyam. Komanda yoldaşlarım da mənə bu işdə ən yaxşı şəkildə kömək edirlər.
- Dünyada sizinlə eyni adı daşıyan 2 məşhur futbolçu var. Biri karyerasını başa vurmuş braziliyalı Ronaldo, digəri isə portuqaliyalı Kriştianu Ronaldu. Ulduz futbolçularla eyni adı daşımaq necə hissdir?
- Bunun müsbət və mənfi tərəfləri var. Çünki Ronaldo kimi futbolçu ilə eyni adı daşımaq asan deyil. Amma çalışacağam ki, öz oyunumla azarkeşləri sevindirim.
- Dominikanlı Ronaldonu "Sumqayıt"da necə qarşıladılar?
- Çox yaxşı. Bəyəndiyim bir şəhərdəyəm və ümid edirəm ki, özümü ən yaxşı şəkildə göstərə bilmək üçün komandaya tez uyğunlaşacağam. Azərbaycan mənə görə soyuq ölkədir. Odur ki, buranın mədəniyyəti ilə yanaşı, havasına da adaptasiya olmalıyam. Amma bu yeni çağırış məni çox həyəcanlandırır.
- Premyer Liqanın son turunda səfərdə "Şamaxı"ya minimal hesabla uduzdunuz. Ümumiyyətlə, son 7 oyunda "Sumqayıt" nə qələbə qazana, nə də qol vura bilir. Sizcə, komandanızın yaxşı nəticələr əldə etməsinə nə mane olur?
- Futbolda belə hallar tez-tez baş verir. Hətta böyük klublar belə, analoji vəziyyətə düşə bilirlər. Odur ki, təslim olmaq lazım deyil. Əksinə, hazırkı durumdan çıxmaq üçün daha çox çalışmalıyıq. İnanıram ki, tezliklə müsbət nəticələr qazanacağıq.
