Sport24.az
İkinci Liqada çıxış edən "Şimal" komandasının oynayan məşqçi Tural Cəlilov Sport24.az saytına müsahibə verib. O, komandanın problemləri və hədəfləri haqda danışıb.
- "Şimal" komandasının stadion problemi var idi. Bir ara xəbər yayıldı ki, Xaçmaz Rayon İcra Hakimiyyəti məsələni aradan qaldırır. Hazırda durum nə yerdədir?
- Stadion məsələsi aktual olaraq qalır. İcra Hakimiyyəti əlindən gələni edir ki, məsələ həll olunsun. Ümid edirik ki, yaxın zamanda stadionumuz olar. Ötən mövsüm Region Liqasından başladıq, çempion olduq, Bu mövsüm də komandamız İkinci Liqada pis təsir bağışlamır. Heyətdə yaxşı futbolçularımız var. Şimal sözünə uyğun klubumuzda kənardan gələn futbolçu yoxdur. Digər komandalara baxanda potensiallı oyunçularımız var. Komandamız ilyarımdır yaranıb, stadiona görə hələ biz biryerdə məşq etməmişik.
- Konkret olaraq nə stadionda nə problem var?
- Arenada tiribunalar var. Soyunub-geyinmə otağı təmir olunmalıdır. Sauna, otel, hovuz var. Təkcə öt örtüyü bərbaddır. Keyfiyyətli ot örtüyü olsa, Xaçmaz futbolunun inkişafı üçün əlimizdən gələni edərik. Mən həm də Xaçmazda uşaqlara məşq keçirəm. 30-dan çox uşaqlarımız "Sabah", "Səbail" və "Turan Tovuz" komandalarında oynayırlar. Şəraitimiz olsa, həmin oyunçuları özümüzdə oynadarıq.
- Sponsor məsələni həll edə bilmir?
- Sponsorumuz var. Öhtələrinə götürdükləri məsələləri yerinə yetirirlər. Amma meydançanın düzəlməsi üçün kifayət qədər məbləğ lazımdır. O pul da bizdə yoxdur.
- "Şimal" komandası qarşısına hansı məqsədi qoyub?
- Mövsümün əvvəlində rəhbərliklə söhbətdə bizə çempionatı orta pillələrdə bitirməyimizi demişdilər. Çalışacayıq ən azı liqanı tərk etməyək. Yaxşı kollektivimiz var. Sona qədər mübarizə aparacayıq.
