"Sheki City"nin prezidenti: "Bizim rayonun biznesmenlərində sosial məsuliyyət yoxdur"

"Məğlubiyyətlərinin və xal üzünə həsrət qalmağımızın çox səbəbləri var. Amma onun hamısı gəlib maliyyəyə dayanır. Sponsorlarımızın olmaması bizi çox geri atır. Bütün yük də mənim üzərimdədir, tək başına komanda saxlamaq çox çətindir. Ötən mövsüm çoxlu borc aldım, onlara hələ də qaytara bilməmişəm. Ona görə də yenidən borca girmək istəmədim. "Sheki City"ni yaradanda başlıca məqsədim daim peşəkarlaşmaq yolunda addımlamaq idi. Amma hazırda dağılmamaq üçün mübarizə aparırıq. Digər komandalardan fərqli, doğru-dürüst məşq keçə bilməmişik, təlim-məşq toplanışımız demək olar ki, olmayıb Oyundan-oyuna yığışırıq. Heyətimizdə olan oyunçuların əksəriyyəti kənar bölgələrdəndir. Biz futbolu rayonu olmamışıq deyə, öz oyunçularımız yoxdur. Buna rəğmən, hazırda aşağı yaş qrupları üzrə komandalarımızda istedadlı uşaqlar var, amma onların da tam yetişmələri, müəyyən yaşa çatmaları və komandamızda oynaması üçün bəlli vaxt lazımdır. Odur ki, hazırda vəziyyətimiz ağırdı". Bu sözləri Sport24.az-a açıqlamasında "Sheki City"-nin təsisçisi və prezidenti Elgün Hüseynov deyib.

Bölgə klubunun rəhbəri sponsor axtarışında olsalar da, bunun hələlik fayda vermədiyini də vurğulayıb: "Biz daim maliyyə axtarışındayıq. Çoxlu sayda iş adamlarına ağız açsaq da, heç kim yaxın durmayıb. Ötən mövsüm bu məsələylə bağlı bəzi çağırışlar, aksiyalar keçirsək də, ayrı-ayrı bölgələrdən cuzi ianələr toplanıldı. Bizim rayonun biznesmenlərində sosial məsuliyyət yoxdur. Onların futbola, idmana marağı, qayğısı, hörməti sıfıır səviyyəsindədir".

Qeyd edək ki, II Liqada IV turdan sonra aktivində xal olmayan  "Sheki City" turnir cədvəlinin sonuncu pilləsində qərarlaşıb.

ABDULLA İSMAYILOĞLU