Sport24.az
"İlk oyunda "doğma divarlar" arasında məğlub olmuşduq. Buna baxmayaraq, təslim olmaq haqqında düşünmürdük. Səfərdə bizi ağır, oyun gözləyəcəyini bilirdik. Odur ki, son saniyəyə kimi döyüşməliydik. Matçın startı bizim üçün yaxşı başlamadı və erkən qol buraxdıq. Sevindirici haldır ki, ruhdan düşmədik. Meydan sahiblərinin oyunçusunun qırmızı vərəqə alması işimizə yaradı. "Zirə"nin azlıqda qalmasından maksimum istifadə etdik. Görüşün taleyi penalti seriyasında həll olunsa da, layiqli qələbə qazandığımızı düşünürəm". Bu sözləri Sport24.az-a açıqlamasında "Şerif"in futbolçusu Mussa Kyabu deyib.
Moldova klubunun kapitanı Bakının isti havasından, gözəlliyindən və gələcəkdə Premyer Liqada oynamaq perspektivindən də danışıb: "Ölkənizdə havanın hərarəti yüksəkdi. İsti havada çıxış etmək çətindi. Bakıda gəzməli, görməli yerlər çoxdu. Xoş xatirələrlə Moldovaya qayıdıram. Ölkə çempionatınızın səviyyəsi də yaxşıdı. 2 oyunda "Zirə"nin bizə yaratdığı çətin anlar buna sübutdu. İlk dəfə idi Azərbaycandaydım və bu ölkənin təmsilçisinə qarşı oynadım. Təklif olsa sizin çempionatda özümü yoxlamaq istəyərəm".
Qeyd edək ki, Avropa Liqasının ilk mərhələsində "Şerif" "Zirə"ni mübarizdən kənarlaşdırıb.
ABDULLA İSMAYILOĞLU
