Sport24.az
"Tovuzda oynamaq həmişə çətin olub. Bu bölgə futbol ab-havasına və "12-ci oyunçu" amilinə görə həmişə fərqlənib. "Turan Tovuz"la oyuna yaxşı hazırlaşmışdıq. Uğurlu nəticə qazananmaq istəyirdik, lakin alınmadı. İlk hissədə sərgilədiyimiz oyun ürəkaçan deyildi. Amma 2-ci yarıda daha yaxşı oynadıq, sadəcə hesabı dəyişə bilmədik. Evə xalsız qayıdırıq. Ümidimizi itirməyib qarşıdakı oyunlarımıza hazırlaşıb uğurlu nəticələr qazanmağa çalışacağıq". Bu sözləri Sport24.az-a açıqlamasında "Səbail"in qapıçısı Hüseynəli Quliyev deyib.
Bayıl təmsilçisinin "çərçivə qoruyucusu" öz performansından və milliyə dəvət alan həmkarlarından da danışıb: "Son 5 oyunda "Səbail"in qapısını mən qorusam da, çıxışımdan o qədərdə razı deyiləm. Ümumiyyətlə heç bir futbolçu tam mənada performansından razı qala bilməz. Hazırda əsas məqsədim daha da yaxşı yaxşı olmaqdı. Yığmaya gəlincə, hamı kimi mən də Azərbaycan millisində oynamağı arzu edirəm. Amma reallığı da qəbul etmək lazımdı. Bu gün yığmaya dəvət alan Yusif İmanov, Mehdi Cənnətov və Rza Cəfərov "üçlüy"ü yaxşı qapıçılardı. Onların düşərgəyə çağrılacağını da gözləyirdim. Qarşıdakı oyunlarda hər üç həmkarıma uğurlar arzulayıram".
Qeyd edək ki, "Səbail" Premyer Liqanın V turunda səfərdə "Turan Tovuz"a 0:1 hesabı ilə məğlub olub.
ABDULLA İSMAYILOĞLU
