Sport24.az
"Oyun bizim üçün çətin oldu. Birinci hissədə rəqib üstün idi". Bu sözləri Sport24.az-a açıqlamasında "Şamaxı"nın futbolçusu Rüfət Abbasov deyib.
20 yaşlı müdafiəçi "Sumqayıt"a 1:0 hesabı ilə qalib gəldikləri Misli Premyer Liqasının XXII turunun oyunu ilə bağlı fikirlərini bölüşüb:
"Komanda olaraq ikinci yarıda toparlandıq və üstün tərəf də biz idik. Lazım olan qolu vurduq və qələbə qazandıq".
Abbasov sonuncu sıradakı "Səbail"lə dörd xallıq fərqin olması barədə danışıb: "Bu, elə də böyük fərq deyil. Biz hər zaman növbəti matçı fikirləşirik. Qarşıdakı turlarda da qələbələrin sayını çoxaltmaq niyyətindəyik. Bizə lazım olan xalları qazanmalıyıq".
Oyunçu XXIII turda "Kəpəz"lə görüşün çətin keçəcəyini söyləyib: "Səfərdə oynayacağıq. Rəqib ev matçlarını Tovuzda keçirsə də, orada yaxşı oyun sərgiləyir. Lakin biz də yaxşı nəticə üçün səfərə yollanacağıq".
Qeyd edək ki, fevralın 17-də baş tutacaq "Kəpəz" - "Şamaxı" oyunu saat 16:00-da start götürəcək.
