Sport24.az
"Şamaxı"nın kapitanı Adil Nağıyev Sport24.az-a müsahibə verib. O, komandasının son oyunlarda qalib gələ bilməməsindən söz açıb.
- Azərbaycan Premyer Liqasının son turunda "Zirə"yə məğlub oldunuz... Oyunu necə şərh edərdiniz?
- Oyuna yaxşı hazırlaşmışdıq. Doğma meydanda qələbə qazanmaq istəyirdik. "Zirə"nin güclü futbolçuları var, yaxşı müdafiə olunurlar. Onlara qol vurmaq çətindir.
- İkinci hissədə sayılmayan qolunuz barədə nə deyə bilərsiniz?
- Baş hakimin qərarına hörmətlə yanaşırıq. Özümüz də baxdıq, oyundan kənar vəziyyət var idi.
- İkinci hissədə komandanız daha inamlı təsir bağışladı. İlk hissədə bu cür çıxış etməyə nə mane oldu?
- Bəli, ikinci hissə daha inamlı idik. İlk hissədə komanda olaraq son nöqtədə düzgün qərarlar verə bilmirdik. Problem yoxdur, futboldur, bu xalları biz qazanmışıq. Növbəti matçlarda daha yaxşı nəticələr qazanacayıq.
- "Şamaxı" 5 oyundur qalib gələ bilmir. Bu durumdan çıxış yolunu nədə görürsünüz?
- 6 oyun uduzmurduq, 5 oyundur qalib gələ bilmirik. Futbolun iki tərəfi var. Məğlubiyyətlər də olur, qələbələr də. Əsas odur bu durumdan komanda olaraq birlikdə çıxaq. Çətin qarşılaşmalar bizi gözləyir. Möhkəm olmalıyıq. Qış fasiləsinə qədər xallarımızı artırmaq istəyirik.
- Növbəti turda səfərdə "Neftçi"nin qonağı olacaqsınız. Həmin matçdan gözləntiləriniz nədir?
- "Neftçi"nin yeni baş məşqçisi var. Uğursuzluqdan çıxmaq istəyirlər. Bizimlə oyunda qalib gəlmək istəyəcəklər. Çalışacayıq qapımızda qol görməyib, ən azından məğlub olmayaq. Maraqlı oyun bizi gözləyir.
