Sport24.az
Cari mövsümdə Premyer Liqada adından söz etdirən qolkiperlərdən biri də "Şamaxı"nın "çərçivə qoruyucusu" Rikardo Fernandesdi. Onun inamlı oyunu bəzi matçlarda "şirlər"in meydandan xal və ya xallarla ayrılmağına səbəb olub. Sport24.az-ın əldə etdiyi məlumata görə, mövsümün ilk yarısında özünü yaxşı tərəfdən göstərən portuqaliyalıya Premyer Liqa klubundan təklif gəlib. "Şamaxı" Rikardonu satmaq istəsə də, son anda fikrindən daşınıb.
Etibarlı mənbədən redaksiyamıza daxil olan bilgiyə əsasən "Sabah" Fernandesə görə bölgə təmsilçisinin qapısını döyüb. "Şamaxı" qapısıçısına görə "bayquşlar"dan öncə 200 min manat istəyib. Tərəflər bir qədər bazarlıq etdikdən sonra 150 min manatda dayanıblar. Lakin son anda "şirlər"in rəhbərliyi və məşqçilər korpusu qışda portuqaliyalını layiqincə əvəzləyə biləcək "çərçivə qoruyucusu" tapa bilməyəcəyini nəzərə alıb təklifdən imtina edib.
"Sabah" "Şamaxı"da ayda 4 min dollar məvacib alan qapıçıya 10 min dollar maaş verməyi planlaşdırırmış. Bu keçid alınmadığından Vasili Berezutski Qazaxıstan millisinin qapıçısı Stas Pokatilovun transferinə razılaşıb.
Qeyd edək ki, Rikardo Fernandesin "Şamaxı" ilə müqaviləsinin müddəti iyunda başa çatır.
