"Sabah"ın qazaxıstanlı qolkiperi: "Mən onların yerinə danışa bilmərəm" - MÜSAHİBƏ

"Sabah"ın qapıçısı Stas Pokatilovun Sport24.az-a müsahibə verib.

- Premyer Liqanın XXIV turunda "Qarabağ"la 1:1 hesablı heç-heçə etdiniz. Oyunla bağlı fikirləriniz...
- Təbii ki, ağır oyun oldu. "Qarabağ"a qarşı matç həmişə çətin alınır. Bütün oyun çətin alınsa da, biz hətta matçın sonlarında qələbə qazanmaq üçün şanslara da sahib idik. Ümumilikdə çətin və maraqlı görüş oldu.

- Havanın da sərtliyini nəzərə alsaq, 1:1 hesablı bərabərliyin sizin üçün qələbə kimi olduğunu demək mümkündür?
- Mən hamının yerinə danışa bilmərəm. Amma düzü, mən soyuq havada oynamağa öyrəşmişəm. Çünki Qazaxıstanda da bu cür havalarda oynamışam.

- "Sabah"ı "Səbail", "Kəpəz"lə görüşlərdə bu cür görə bilmirik, amma "Qarabağ"la daha yaxşı oynayırsız. Sizcə, problem nədədir?
- Bu barədə bir söz deyə bilmərəm. Ola bilər ki, "Qarabağ"a qarşı bütün komandalar daha yaxşı hazırlıqlı olurlar. Hansısa motivasiya lazım deyil, çünki rəqibin kimliyi bəllidir. İstər-istəməz daha toparlanmış olursan. Biz də bütün matçlarda olduğu kimi, "Qarabağ"la görüşdə də ən yaxşısına çalışdıq.

- "Qarabağ"la görüşün ikinci hissəsində rəqibə boş zona da vermədiz, daha fərqli oynadız. Vasili Berezutski fasilədə hansı tövsiyyələr vermişdi?
- Matçdan əvvəl dediklərini fasilədə də təkrarladı. Öz oyunumuzu oynamağı tapşırmışdı. Ətraflı nəsə deməyəcəm. Çünki bu bizim taktikamızdır, oyunumuzdur. Amma onu deyə bilərəm ki, biz baş məşqçinin tapşırıqlarını yerinə yetirməyə çalışdıq.

- Qarşıdakı matç kubokda "Sumqayıt"a qarşıdır. Rəqib 9 oyundur ki, qalib gələ bilmir, qol vura bilmir. Bu görüşdə şanslar haqda nə deyəcəksiz?

- Mən onların yerinə danışa bilmərəm. Bu "Sumqayıt"ın özünün problemidir. Bizim öz işimizə baxırıq. Hədəfimiz mərhələni adlamaqdır. Sona qədər də hər şeyi edəcəyik.

- "Kayrat"ın heyətində "Qarabağ"a qarşı Tofiq Bəhramovda oynamışdınız. Həmin görüşü necə xatırlayırsız?
- Bəli, yaxşı yadımdadır həmin oyun.

- O, "Qarabağ" güclü idi, yoxsa indiki?
- Məncə, "Qarabağ" hər dövrdə güclü idi. Görüşü də yaxşı xatırlayıram.

- "Qarabağ"ın sabiq qapıçısı, "Dinamo"nun üzvü Andrey Lunyova çox oxşadığınızı sizə deyiblər?
- Bəli, deyiblər. Xeyr, amma kiminsə məni Lunyovla səhv saldığını bilmirəm (gülür). Ancaq xarici görünüşümlə ona bənzədiyimi bildiriblər.