Sport24.az
"Turun ən maraqlı oyunu "Neftçi" – "Zirə" qarşılaşmasıdır. Hər iki komandanın xal itkiləri var. Samir Abasov gəldikdən sonra heyəti tam formalaşdıra bilməyib. "Zirə"də avrokubok oyunlarından sonra eniş hiss olunur. Bu matça dönüş kimi baxa bilərlər. Görüşün heç-heçə ilə bitəcəyini düşünürəm". Bu sözləri Sport24.az-a açıqlamasında futbol mütəxəssisi Arif Əsədov Azərbaycan Premyer Liqasında XIV turundakı oyunlarından gözləntilərini açıqlayarkən deyib.
O, turun ilk qarşılaşması olan "Kəpəz" – "Araz Naxçıvan" oyunu haqda fikirlərini bildirib:
""Kəpəz" – "Araz Naxçıvan" oyununda üstünlük qonaqların tərəfindədi. "Araz Naxçıvan" "Qarabağ"a məğlub olduqdan sonra ardıcıl qələbələr sıralayır. Futbolçularda ustalıq və özünəm inam var. Yəqin ki, milli fasilədə öz oyunlarını daha da təkminləşdirdilər. "Kəpəz" isə getdikcə öz oyununu tapır. Komandada irəliləyiş var. Bu görüşdə hər bir nəticə ola bilər".
Əsədov daha sonra "Səbail" - "Qarabağ", "Turan Tovuz" - "Sabah" və "Sumqayıt" - "Şamaxı" oyunları barəsində danışıb:
"Səbail" – "Qarabağ" oyununa gəldikdə isə "dənizçilər" ev oyunlarını süni örtüklü meydançada keçirir. Bu baxımdan "Qarabağ"ın işi çətin ola bilər. Baş məşqçi Cavid Hüseynov ilk oyununa çıxacaq. Hansı oyuna üstünlük verəcəyi maraq doğurur. Milli fasilə ən çox "Qarabağ" üçün keçir. Çünki futbolçuların çoxusu yığmada olur. Bu baxımdan fasilədən sonra futbolçuları ilk oyuna hazırlamaq çox çətin olur. Ağdam təmsilçisi favoritdir, amma "Səbail"də sürprizləri sevir.
"Turan Tovuz" – "Sabah" matçı maraqlı keçəcək. Kurban Berdıyev komandanı daha çox nəticəyə oynadır. "Sabah"da fasiləyə qədər eniş hiss olunurdu. Ardıcıl xal itkiləri, gözlənilməz nəticələr kimi. "Bayquşlar" üçün ölüm-dirim oyunu olacaq. Uduzsalar, baş məşqçinin taleyi necə olacaq maraqlıdır.
"Sumqayıt" – "Şamaxı" komandaları bir-birilərinə uyğun rəqibdir. Bərabər səviyyəli oyun olacaq. "Sumqayıt" iki qələbədən sonra məğlub oldular. Hər iki komanda üçün vacib oyundur. Az da olsa, üstünlük "Sumqayıt" tərəfindədir".
