Sport24.az
"Çətin oyun oldu. Rəqib yaxşı təşkil olunmuş komandadır. Onların hücumçuları oyun boyu çox yaxşı pressinq edirdilər". Bu sözləri Sport24.az-a açıqlamasında "Sabah"ın futbolçusu Con İrasabal deyib.
28 yaşlı ispan müdafiəçi "Araz-Naxçıvan"la 2:2 hesablı heç-heçə etdikləri Misli Premyer Liqasının XXV turunun oyunu ilə bağlı fikirlərini bölüşüb:
"Hər iki komandanın qol imkanları oldu. Fikrimcə, bizim qol fürsətləri daha real idi, lakin rəqib cərimə meydançasının xaricindən vurulan zərbələrlə iki dəfə fərqlənə bildi. Artıq bu matç geridə qalıb, indi bu oyunu unudub, qarşıdakı görüşlərə köklənməliyik".
İrasabal XXVI turda "Şamaxı"ya qarşı keçirəcəkləri matç haqqında da danışıb:
"Bizi səfərdə asan oyun gözləmir. Burada xüsusilə meydançanın süni örtüyünü qeyd etməliyəm. Şamaxıdakı meydanda oynamaq çox çətindir. Bizimlə müqayisədə rəqib bu meydançada oynamağa vərdiş olub. Bu oyundan qələbə ilə ayrılmaq istəyiriksə, daha tez uyğunlaşmalıyıq".
Qeyd edək ki, martın 9-da baş tutacaq "Şamaxı" - "Sabah" matçı saat 15:00-da start götürəcək.
