Sport24.az
Ötən mövsüm "Qəbələ"də çxış etmiş braziliyalı futbolçu Lukas Afriko Sport24.az-a müsahibə verib.
- Portuqaliyanın "Farense" klubunda çıxış edirsən. Yeni klubunda işlərin necədir?
- "Farense"də hər şey qaydasındadır. Yaxşı mövsüm keçirdiyimi də deyə bilərəm. Əsas liqada qalmağa çalışırıq. Hazırda 15 xalla 17-ci pillədəyik.
- "Qəbələ" karyeranı necə xatırlayırsan?
- Yaxşı və bir o qədər yaxşı olmayan zamanlar var idi. "Qəbələ"yə sevgim var. Ümid edirəm ki, uğur qazanacaqlar və yenidən Azərbaycan Premyer Liqasında çıxış edəcəklər.
- Portuqaliya Liqasında çıxış edirsən. Ölkəmizdəki çempionatla müqayisə edə bilərsənmi?
- Bu çempionatlar arasında çox fərq görürəm. Hamıya bəllidir ki, Portuqaliya liqası daha yaxşıdır. Mentalitet, rəqabət qabiliyyəti, təşkilatçılıq və digər şeylər.
- "Qəbələ"dən ayrıldıqdan sonra karyeranı Azərbaycanda davam etdirmək imkanı oldu?
- Xeyr. Azərbaycan klublarından heç bir təklif almamışdım. Bu səbəbdən özünə yeni komanda axtardım.
- Təklif gəlsə karyeranı yenidən ölkəmizdə davam etdirmək istəyərsən?
- Gələcəkdə nələrin olacağını yalnız Allah bilir. Biz heç nə bilmirik. Sadəcə onu deyə bilərəm ki, hər şey mümkündür.
