Sport24.az
"Qəbələ"nin nigeriyalı futbolçusu Oçe Oçeveçinin Sport24.az-a müsahibəsi
- Komanda hazırda I Liqada 39 xalla liderdir. "Qəbələ"nin Premyer Liqaya vəsiqə qazandığını demək olarmı?
- Hər kəsə bəlli olduğu kimi, bu mövsüm hər birimiz bir məqsədə, Premyer Liqaya yüksəlməyə köklənmişik. Düşünürəm ki, artıq hədəfimizə çatmaq üçün gediləcək yolun yarısındayıq. Lakin hələ mövsüm başa çatmayıb. Sona qədər mübarizə aparmalı və mövsümü maksimum nəticə ilə bitirməliyik. İşimizi şansa saxlamaq istəmirik.
- Ötən turda MOİK-i dörd cavabsız qolla üstələdiniz. Oyun haqqında nə deyə bilərsən?
- MOİK-lə ötən turda baş tutan görüş göründüyü qədər asan keçmədi. Oyunda qələbə qazandığımıza görə çox xoşbəxtəm. Nəzərə alsaq ki, bu qələbə ilə liderliyimiz bir qədər də möhkəmləndi, bu bizi çox sevindirir.
- Ötən ilin sentyabrından "Qəbələ"də çıxış edirsən. Gəlməmişdən əvvəl klub haqqında, Azərbaycan futbolu haqqında məlumatın var idi?
- Bəli. Azərbaycana gəlməzdən öncə əvəvllər burada oynayan bir dostumla danışdım. Mənə ölkə, çempionat və xüsusən də "Qəbələ" barədə çox müsbət danışdı. Onun da məsləhəti ilə klubdan gələn təklifi qəbul etdim. Düşərgəyə qatıldıqda isə düzgün qərar verdiyimə bir daha əmin oldum.
- I Liqanın səviyyəsi barədə nə deyə bilərsən?
- Düşünürəm ki, 1-ci Liqa kifayət qədər yaxşı təşkil olunmuş çempionatdır. Hər bir komandanın öz qarşısına qoyduğu məqsədləri var. Bu da onlar arasındakı rəqabəti daha da gücləndirir. İstənilən halda isə sonda yarışın və oyunların daha da göz oxşamasına və maraqlı keçməsinə şərait yaradır.
- Premyer Liqaya vəsiqə qazanandan sonra komandada qalmağı planlaşdırırsanmı?
- Bu məsələlər barədə yalnız mövsümün sonunda qərar veriləcək. Hazırda bu barədə düşünmürük. Çünki, indi biz yalnız Premyer Liqaya yüksəlmək haqda fikirləşirik. Məncə, hazırda hər şeydən vacib olan məsələ məhz budur. Əminəm ki, əziyyətimizin bəhrəsini görərək mövsümün sonunda qoyduğumuz hədəfə çatmış olacağıq.
