Sport24.az
"Qəbələ" yeni mövsümün hazırlığına bu gün start verəcək. Sport24.az xəbər verir ki, bunu klubun mətbuat xidməti açıqlayıb.
"Qırmızı-qaralar" məşqlərə Qəbələdə başlayacaq. 2024/25 mövsümünə hazırlığın ilk mərhələsi seleksiya xarakteri daşıyacaq. Komandanın ilk məşqi günün ikinci yarısında gerçəkləşəcək.
Seleksiya xarakterli hazırlıq prosesi bir həftə davam edəcək. Ardınca "Qəbələ"nin təlim-məşq toplanışına start veriləcək. Hazırlıq prosesi Qəbələ şəhər stadionunda gerçəkləşəcək.
Mövsümün startına qədər yoxlama oyunlarının keçirilməsi planlaşdırılıb. İlk matç iyulun 31-də baş tutacaq. "Qırmızı-qaralar" Qəbələdə təlim-məşq toplanışında olan Küveytin "Əl-Yarmuk" klubu ilə üz-üzə gələcək. Digər yoxlama oyunlarının tarixi və rəqiblər hələ dəqiqləşməyib.
Qeyd edək ki, I Liqada yeni mövsümə sentyabrın 11-də start veriləcək. Yarışın püşkatma mərasimi avqustun 13-də AFFA-nın inzibati binasında təşkil olunacaq.
