Sport24.az
"Qalatasaray"ın futbolçusu Hakim Ziyeş yenidən İngiltərə Premyer Liqasında çıxış edə bilər. Sport24.az xəbər verir ki, "Vulverhempton" mərakeşli vingeri transfer etmək istəyir.
Bu barədə "Sabah" nəşri məlumat yayıb.
Premyer Liqa təmsilçisinin baş məşqçisi Vitor Pereyra Ziyeşi komandasında görmək istəyir. "Vulverhempton" rəsmiləri 31 yaşlı ön xətt oyunçusunun meneceri ilə danışıqlara başlayıb. "Canavarlar" təcrübəli futbolçunun keçidini bu ay yekunlaşdırmağı planlaşdırır.
Qeyd edək ki, "Qalatasaray" Hakim Ziyeşi 2023-cü ilin avqust ayında "Çelsi"dən transfer edib. Mərakeş millisinin üzvü bu mövsüm İstanbul təmsilçisinin heyətində meydana çıxdığı 11 rəsmi matçda 1 qol ötürməsi ilə yadda qalıb. Onun klubla müqaviləsi yayda başa çatır.
