Sport24.az
"Milan"ın baş məşqçisi Serxio Konseysao A Seriyasının 27-ci turunda "Latsio"ya məğlubiyyətdən (1:2) sonra komandadan ayrılıb-ayrılmayacağı haqda sualları cavablandırıb. Sport24.az "La Gazetta dello Sport"a istinadən xəbər verir ki, o, istefa vermək niyyətində olmadığını deyib:
"Bu vəziyyətdən yeganə çıxış yolu təmsil etdiyimiz rənglər uğrunda mübarizə aparmaqdır. Başa düşmək lazımdır ki, belə çətin vəziyyətdə meydana çıxanda nəyisə idarə etmək çox çətindir. Biz bunun üzərində işləyirik. Komandada texniki cəhətdən güclü futbolçuların olduğuna inanıram.
Mən istefa verməyi düşünürəmmi? Məni maraqlandıran odur ki, matçdan sonra futbolçuların məyusluğunu görməyim. Daha çox işləməyə hazıram. Ona görə də mən istefa vermək fikrində deyiləm".
Qeyd edək ki, "Milan" hazırda İtaliya A seriyasının turnir cədvəlində 9-cu pillədə qərarlaşır.
