Sport24.az
Dünən "Araz-Naxçıvan" doğma publika qarşısında "Kəpəz"ə qalib gəldi. Gərgin keçən 90 dəqiqənin taleyini bir qol həll etdi. Oyundan sonra "sarı-göylər"in qolkiperi Rojerio Santos oyundan sonra Sport24.az-ın əməkdaşının suallarını cavablandırıb.
- Ardıcıl 6-cı məğlubiyyətinizi aldız. Oyunla bağlı nə deyərdin?
- Bura yaxşı nəticə üçün gəlmişdik. Amma yenə məğlub olduq. Bu halın tez-tez təkrarlanması yaxşı deyil. Odur ki, nəticələrimizi yaxşılaşdırmaq üçün çox çalışmalıyıq.
- Bir müddət zədəyə görə kənarda qaldın. Hazırda vəziyyətin necədi?
- Formamı tam bərpa etmişəm desəm, yalan olar. Qarşıdakı həftələrdə lazım olan formaya düşəcəyimə inanıram. Buna baxmayaraq, özümü yaxşı hiss edirəm.
- "Kəpəz"ə məşqçi dəyişikliyi gerçəkləşdi. Azər Bağırovun futbol fəlsəfəsini mənimsəyə bilirsiz?
- Azər müəllim komandada yenidir, həmçinin bizdə təzə oyunçular da var. Düşünürəm ki, yenilər də adaptasiya prossesini tam keçəndən sonra hər şey qaydasına düşəcək. Bizə vaxt lazımdı.
- 6 oyuna 6 məğlubiyyət... Bu nəticə komandada ruh düşkünlüyü yaratmır?
- Əlbəttə ki, 6 turun hamısında məğlub olmaq və turnir cədvəlinin dibində qərarlaşmaq xoş deyil. Heç bir komanda belə vəziyyətdə olmağı ağlından keçirməz. Ancaq təslim olmaq fikirimiz yoxdu. Qarşıdakı 30 turda maksimum gücümüzü ortaya qoyub zirzəmidən qurtulmağa çalışacağıq.
- "Autsayder" statusundan qurtula bilməyib elitanı tərk etsəz nə olacaq?
- Biz hər oyunda meydanda döyüşürük. Bundan sonra əlimizdən gələnin daha artdığını etməyə çalışacağıq. Odur ki, elitayla vidalaşmağı ağlımızdan belə keçirmirik.
ABDULLA İSMAYILOĞLU
