Sport24.az
"Kəpəz"nin "Neftçi"yə və "Səbail"ə qalib gəlməsi bu komandalarda baş məşqçi istefalarına səbəb olub. Gəncə təmsilçisi Roman Qriqorçuk və Şahin Diniyevin postundan getməsi barədə sosial şəbəkədə maraqlı paylaşımla yadda qalıb. Premyer Liqanın autsayderinin bu addımı isə bəzilələri tərəfindən heç də xoş qarşılanmayıb.
"Sarı-göylər"in mətbuat katibi Azad Mustafayev Sport24.az-a açıqlamasında sözügedən postla bağlı fikirlərini bölüşüb:
"Son illərdə bütün dünyada klubların sosial mediadakı paylaşımları diqqət çəkir. Xarici klublarda bu tip paylaşımlar daha çox olur. Ölkəmizdə də klublarımız artıq bu cür addımlarla seçilməyə çalışır. "Kəpəz"lə "Səbail" arasında oyunlardan sonra adətən nəticəyə uyğun bele posterlər paylaşılır. Yəni bizim paylaşımımız ilk yox, növbəti idi. "Səbail" klubu tərəfindən də bizimlə bağlı belə paylaşımlar olub. Belə işlər klublar arasında rəqabəti artırır. Rəqabətin davamlı olması əslində yaxşı bir haldır".
"Kəpəz" ölkə çempionatının 9-cu turunda "Neftçi"ni 4:3 hesabı ilə məğlub etdikdən sonra"ağ-qaralar"ın baş məşqçisi Roman Qriqorçuk uğursuz nəticələrə görə postundan göndərilib.
12-ci turda isə Gəncə təmsilçisi "Səbail"i doğma meydanda 1:0 hesabı ilə məğlub edib. Bu nəticədən sonra "dənizçilər"in çalışdırıcısı Şahin Diniyev oyundan sonra keçirilən mətbuat konfransında istefa verdiyini açıqlayıb.
