Sport24.az
"Kubokdakı oyunlardan sonra bizə yaxşı nəticə lazım idi. Turnir cədvəlinin aşağı hissəsindəki durumu görə bilirsiniz. Biz çox vacib xallar qazandıq". Bu sözləri Sport24.az-a "Kəpəz"in kapitanı Yeqor Xvalko deyib.
28 yaşlı müdafiəçi "Neftçi"yə 1:0 hesabı ilə qalib gəldiklər Misli Premyer Liqasının XXV turunun oyunu ilə bağlı fikirlərini bölüşüb:
"Neftçi" yaxşı komandadır. Biz bu qarşılaşmada üç xalı hədəfləyirdik. Daha böyük hesabla qalib gəlmək üçün şanslarımız da oldu. Amma qələbəni də əldən verə bilərdik. Qapıçımız son anda bizi xilas etdi".
Belaruslu oyunçu qarşıdakı "Sumqayıt"la matça köklənəcəklərini söyləyib:
"Bu rəqiblə xallarımız eynidir. "Şamaxı"dan isə iki xal geridəyik. Yalnız irəli baxırıq. Əgər xal qazanacağıqsa, geriyə baxmağın mənası yoxdur"
Xvalko "son qələbəyə görə mükafat alacaqsınızmı" sualını isə bu cür cavablandırıb:
"Bəli. Hər qələbəyə görə bonusumuz var. Bunların hamısı yaxşı mükafatdır. Heç kim çempionatda sonuncu yeri tutmaq istəmir. Bu, adamın qüruruna toxunar. Pul haqqında fikirləşmirik. İlk növbədə çempionatda qalmağı hədəfləyirik".
